ෂෙහෙරාසඩ් සහ අරාබි නිසොල්ලාසය

                     (ෂෙහෙරාසඩ් කුමරිය)

එක්දහස් එක් රැයේ කතාව 

අදින් ශතවර්ශ ගණනාවකට කලින් මැදපෙරදිග කලාපය හා අසල්වැසි මධ්‍ය ආසියාතික රාජ්‍යන්ගේ සිට නැගෙනහිර දිශාවට ඉන්දියාව දක්වාත් ගංගා නදියෙන් ඔබ්බට චීන දේශ සීමාව දක්වාත් විහිදුනු සමස්ත ආසියාතික භූමිස්කන්ධය වසාගෙන මහා පර්සියානු අධිරාජ්‍යයාගේ කිරීටයේ අණසක පැතිරී තිබූ පරිසියානු අධිරාජ්‍යයේ ස්වර්ණමය යුගයේදී සිද්ද වුන කතාවක් තමයි මේක.
එවකට අධිරාජ්‍යයේ පාලකයා වූයේ ෂහායර් නම් තරුණ කඩවසම් රජකෙනෙක්.ඒ කාලේ අධිරාජ්‍යයාට තිබුනේ අසීමිත බලයක්..ඒ නිසා පර්සියානු අධිරාජ්‍යයා ප්‍රසිද්ධ වෙලා හිටියේ "රජුන්ගෙත් රජ" කියලා..
මෙයාට හිටියා තව බාල සහෝදරයෙක් "ශහ් සාමන්" කියල.අන්න ඒ සහෝදරයා තමයි වර්තමාන උස්බෙකිස්තානයට අයිති "සමර්කාඩ්" ප්‍රදේශයේ සුල්තාන් වෙලා හිටියේ..
තරුණ ෂහායර් අධිරාජ්‍යයා පුරුදුවෙලා හිටියා රෑට රෑට වෙස්වලාගෙන නගරය පුරා සැරිරලා සාමාන්‍ය ජන ජීවිතයේ තත්වය ගැන සොයාබලන්න..ඉතින් දවසක් ඔය වගේ රාත්‍රී මුර සංචාරේ යනවෙලාවක අධිරාජ්‍යයා දකිනවා තමන්ගේ සහෝදරයාගේ බිරිඳ රජගෙදර කෝකියා සමග ඉන්නවා..ඒ දෙන්නා අයතා සම්බන්දයක් පටලවගෙන..මේක රජ පවුලට වගේම රජුන්ගෙත් රජ වුන තමන්ට කරපු ලොකු අපහාසයක්..ඉතින් තාපසයෙක්ගේ වුනත් ඇඟේ මාලු නටවන්න පුළුවන් මේ වගේ සිදුවීමක් දැක්කාම බලවත්  රජකෙනෙක් ගැන කවර කතාද...ක්ෂණික කෝපයෙන් මුළු ඇඟම පිච්චුන ෂහායර් රජතුමා තමන්ගේ රාජකීය අසිපතෙන් ඒ වෙලාවම ඒ දෙන්නව ඒ කියන්නෙ සහෝදරයගේ වංචාකාර බිරිඳයි ඇයගේ අනියම් ප්‍රේමවන්තයා වුන කෝකියවයි මරල දානවා..
මේ සිද්දවුන සිද්දියෙන් කම්පනයට පත්වුන අධිරාජ්‍යයා තමන් ගියපු රාජකාරිය අතරමැද නවත්තලා ආපහු මාලිගාවට එනවා..ඇත්තටම ඒක හදිස්සි පැමිණීමක්..ඉතින් මේ හදිස්සියේම මාලිගාවට ආපු රජතුමා ඊලඟට දකින දෙයින් එතුමාගේ කෝපය දෙගුණ තෙගුණ වෙනවා..ඒ කියන්නේ තමන්ගේ බිරිඳ එනම් එතුමාගේ රාජකීය බිසවත් අර කලින් සහෝදරයාගේ බිරිඳ වගේම වෙනත් පිරිමියෙක් එක්ක ඉන්නවා මෙතුමා දකිනවා..එක ලඟම වුනු මේ අනපේක්ෂිත සිදුවීම් ද්විත්ව‍යෙන් වික්ශිප්ත වුන ෂහායර් රජතුමා තවමත් ලෙයින් තෙත්වී තිබුණු තමන්ගේ රාජකීය අසිපතෙන් තමන්ගේ වංචාකාර බිරිඳත් ඈ සමග යහන් ගතවී සිටි ඇගේ අනියම් ප්‍රේමවන්තයාත් දෙපලු කරල විතරක් නවතින්නෙ නෑ..එතුමා කාන්තාවක් ගැන අතිශයින්ම කලකිරෙනවා..සියලු ස්ත්‍රීන් වංචාකාරියන් විදියට දකින්න පුරුදු වෙනවා..ඉතින් කාන්තාවන් ගැන ඇතිවුන මේ වෛරයේ ප්‍රතිපලයක් විදියට පහුවදා උදේම රාජසභාව කැඳවපු රජතුමා අතිශයින්ම දරුණු අනුකම්පාව විරහිත රාජ ආඥාවක් නිකුත් කරනවා..
ඒ තමයි සෑම උදෑසනකම එක් කන්‍යාවියක් අධිරාජ්‍යයේ පාලකයා වන තමන් විසින් විවාහකරගන්නා බවත් එදින රාත්‍රිය ඇය සමග ගතකර පසුවදා උදේම එම ස්ත්‍රියගේ හිසගසා දමා නැවත තවත් ස්ත්‍රියක් විවාහ කරගන්නා බවත් සියළු රටවැසියන්ට දැන්වූ රාජ නියෝගය.
ඉතින් ඒ විදියට හැම උදේකම එක් කන්‍යාවියක් විවාහ කරගෙන පසුවදා ඇයගේ හිස ගසා දමා තවත් කන්‍යාවියක් විවාහ කරගනවා..ඇයටත් ඒ ඉරණමමයි..මේ විදියට දවස් ගණන් , සති ගණන් , මාස ගණන් ගෙවිල අවුරුදු ගණනුත් ගෙවිල යනවා..සමහර ගැහැණු ළමයි තමන්ගේ පණ බේරගන්න රහසේම ඈත ප්‍රදේශවලට පැනය යනව..ඉතිරි  අය රජ අණට කීකරු වෙලා තමන්ගේ ජීවිතෙන් වන්දි ගෙවනවා..කාලයක් ගෙවිල යද්දි අගනුවරත් ඒ අවට අනෙක් ප්‍රදේශවලත් ගැහැණු ළමයි දෙදෙනෙකු හැරෙන්න වෙනත් කිසිඳු කන්‍යාවක් ඉතිරිවෙලා හිටියේ නෑ..ඔක්කොම රාජ නියෝගයෙන් මරලා..සුළු පිරිසක් පැනල ගිහිල්ලා..
මේ ඉතිරි වෙලා හිටිය දෙන්න තමයි අධිරාජ්‍යයාගේ රාජකීය ලේඛම්ගේ දුවල දෙන්න..ලොකු දුව "ෂෙහෙරාසාඩ්"..පොඩි දුව "දුන්‍යාසාඩ්".එහෙම නැත්නම් "ඩිනාසාඩ්"..මේ දෙන්නගෙන් නංගි ගොඩක් පොඩියි.එයාට විවාහයකට යන්න තරම් වයසක් නෑ.ඉතින් යන්තම් තරුණ වයසට පාතබල තිබ්බ අහිංසක රූමත් වඩාත් සිත්ගන්නාසුළු ෂෙහෙරාසඩ් දිහාවට මාරයාගේ බැල්ම වැටෙනවා.රාජකීය ලේඛම් වුනත් ෂෙහෙරාසඩ්ගේ පියාණන්ට තමන්ගේ දියණියව බේරගන්න විදියක් නෑ.මොකද රජ අණ සියල්ලට උඩින් පවතින නිසා.ඉතින් තමන්ගේ ආදරණීය දියණියට අත්වෙන්න යන ඉරණම ගැන කම්පා වුන ෂෙහෙරාසඩ් කුමරියගේ පියාණන් දියණියට රහසේම පැන යන ලෙසට යෝජනා කරනවා.පැනල යන්න අවශ්‍යය සියලු කටයුතු සූදානම් කරනවා.නමුත් නිර්භීත ෂෙහෙරාසඩ් කුමරිය රාජ නියෝගයට කීකරු වෙන්න තීරණය කරනවා.පියාණන් බැගෑපත්ව ඉල්ලනවා.ඒත් ෂෙහෙරාසඩ් කුමරිය තීරණය කරලා ඉවරයි තමන්ගේ ඉරණමට මුහුණ දෙන්න.ඉතින් ගෙදර අයගෙන් සමුඅරන් තමන්ව අරන් යන්න ආපු රාජකීය දෝලාවේ නැගල ෂෙහෙරාසඩ් මාලිගාවට පිටත් වෙනවා.
රජතුමා එක්ක විවාහ වෙනවා.දවස ගෙවිල යනවා.රාත්‍රිය උදාවෙනව වෙනද වගේම මූසල විදියට මේ රජ මැදුරට.
හැබැයි ෂෙහෙරාසඩ් කුමරිය හරිම බුද්ධිමත්.එතරම් ලේසියෙන් මාරයාට හිස දන් දෙන්න ඇය සූදානම් නැහැ.ඉතින් ෂෙහෙරාසඩ් කුමරිය පොඩි උපක්‍රමයක් කල්පනා කරනවා තමන්ගේ මරණය කල් දාගන්න.ඉතින් මෙයා රජතුමාගෙන් ඉල්ලනවා තමන්ට අවසන් කැමැත්තක් ඉශ්ට කරන්න ඉඩ දෙන්න කියලා.තමන් සෑම රාත්‍රියකම නින්දට පෙර තමන්ගේ නැගණියට කතන්දර කියා දෙන බවත් එදින තමන්ට ජීවත් වීමට ඉතිරිව ඇති අවසාන රාත්‍රියේද තම නැගණිය වෙනුවෙන් ඒ යුතුකම ඉටුකිරීමට අවසර දෙන මෙන් රජතුමාගෙන් ඉල්ලා සිටිනවා.රජතුමා සිය අනුමැතිය ඒ සඳහා ලබාදෙනවා.
සිය නැගණියව මාලිගාවට ගෙන්න ගන්නා ෂෙහෙරාසඩ් කුමරිය නැගණියව ඇය අසලින් තබාගෙන කතාව කියන්න පටන් ගන්නවා..කාමරේ කෙලවරක රජතුමත් වාඩිවෙලා ඉන්නවා.ඒ ඉන්න ගමන් එයත් කතාවට ඇහුම්කන් දීගෙන ඉන්නවා.කුතුහලයෙන් පිරුණු මේ කතන්දරය ඉතාමත් උද්වේගකර විදියට ගලාගෙන යනකොට මේකට ඇහුම්කන් දීගෙන හිටපු රජතුමාගෙ හිතත් දැන් කතාවට තදින්ම ඇලිලා..
මැදියම් රැයත් පහුවෙනකම්ම කතාව කියපු ෂෙහෙරාසඩ් එකපාරටම කතන්දරයේ උච්චතම තැනේදී කතාව නතර කරනවා..දැන් රජතුමාට ඉතුරු ටික දැනගන්න කල් ඉවසිල්ලක් නෑ.ඉතින් රජතුමා ෂෙහෙරාසඩ්ට නියෝග කරනවා කතාවේ ඉතුරු ටිකත් කියන්න කියලා..ඉතින් දැන් බොහෝ රෑබෝ වී ඇති බවත් හෝරා කීපයකින් හිරු පායන බවත් කතාව සම්පුර්ණ කිරීමට දැන් කාලයක් නැති බවත් ෂෙහෙරාසඩ් කුමරිය රජතුමාට පවසනවා.ෂෙහෙරාසඩ්ව මැරුවොත් කතාවේ ඉතිරි ටික දැනගන්න විදියක් රජතුමාට නෑ.ඉතින් රජතුමා කතාව අවසන් කිරීමට තවත් එක් රැයක් ජීවත් වීමේ වරම ෂෙහෙරාසඩ් කුමරියට ලබාදෙනවා.ඒ ඊලඟ රාත්‍රියේ කතාව අවසන් කරයි කියන බලාපොරොත්තුවෙන්.ඊලඟ රාත්‍රිය එළඹුණාට පස්සේ ෂෙහෙරාසඩ් සුපුරුදු පරිදි කතාව පටන් ගන්නවා.ඉක්මනට කියමිනි හිටි කතාව ඉවර කරල අලුත් කතාවක් පටන ගන්නවා.ඒ කතාවත් උච්චතම තැනට ගෙනල්ලා එක පාරටම නවත්තනවා.ඊට පස්සෙ වෙන්නෙත් කලින් සිදුවීම් ටිකමයි.ෂෙහෙරාසඩ්ට තවත් රැයක් ලැබෙනවා ඒ කතාවත් ඉවර කරන්න.
ඔය වගෙ හැමදාම කතාවේ උච්චතම තැනදී කතාව නතර කරන ෂෙහෙරාසඩ් කුමරිය කතාව සම්පූර්ණ කිරීමට තවත් එක් රැයක් ජීවීත් වීමේ වරම බලාගන්නවා..කාලයක් ගෙවිල යද්දී කතන්දර එකින් එක අහගෙන ඉද්දී ෂෙහෙරාසඩ්ව මරාදැමිය යුතු බව අමතක වෙලා ඇයගේ මේ අපූරු කතාන්දර ඇසීම රජුගේ පරම අපේක්ෂාව බවට පත්වෙනවා.එතුමා නොදැනීම එතුමාගේ තද සිත මෙලෙක් වෙලා ෂෙහෙරාසඩ්ගේ කතන්දර ගාවත් ෂෙහෙරාසඩ් ගාවත් නවතිනව.
ඉතින් ඔය විදියට රැයවල් එකින් එක ගෙවිල ගිහින් නොදැනීම රාත්‍රීන් එක්දහස් එකක්(1001) ගෙවිල යනවා.මේ රාත්‍රීන් එක්දහස් එක පුරාවට ෂෙහෙරාසඩ් දන්න කතන්දර සේරම අවසන් වෙලා ඉවරයි.තවදුරටත් කියන්න කතන්දරයක් ඇය සතුව නැහැ.ඉතින් ෂෙහෙරාසඩ් කුමරිය ඒ බව රජතුමාට දැනුම් දීලා මරණය වැළඳ ගන්නට හිතාහදාගන්නවා.නමුත් පසුවදා උදෑසන මරණය වෙනුවට ඇයව වැළඳ ගන්නේ මරණීය නියෝගය නිකුත් කල තමන්ගේ කතන්දර රාත්‍රීන් එක්දහස් එකක් පුරා අසා සිටි මහා පර්සියානු අධිරාජ්‍යයායි.ඒ මේ වන විටත් අධිරාජ්‍යයාගෙ හිත ෂෙහෙරාසඩ් ගාව නැවතී ඇති නිසයි.කිසිදිනෙක නැවත ආදරය හමු නොවේයැයි සිතූ තමන්ගේ හිත ආදරයෙන් තෙත් කල මේ සුන්දර කාන්තාර කුසුම අසිපත් පහරකින් සිඳලන්නේ කෙසේද්..?

එය කොයි තරම් නම් පාපයක්ද..? 

කොයිතරම් නම් ශාපයක්ද..? 

ඉතින් අධිරාජ්‍යයා තමන්ගේ රාජ නියෝගය ඉවත් කරගන්නවා විතරක් නෙමෙයි ෂෙහෙරාසඩ් කුමරියව තමන්ගේ අග්‍ර මහේෂිකාව බවත පත් කරගන්නවා..ඒ වගේම ෂෙහෙරාසඩ්ගේ නැගණිය නිසි වයසට එළඹුනාව ඇයව තමන්ගේ සහෝදරයට විවාහ කරලත් දෙනවා..

අන්න ඒ විදියට තමයි රාත්‍රීන් එක්දහස් එකක්  කතන්දර කියූ සුන්දර ෂෙහෙරාසඩ් කුමරිය මුළු මහත් පර්සියානු අධිරාජ්‍යයටම අග රැජිණ වෙන්නේ..
ෂෙහෙරාසඩ් කියපු කතන්දර "එක්දහස් එක් රැය" නමින් පර්සියානු අධිරාජ්‍යය පුරාත් පසුකාලීනව ලෝකය පුරාත් ප්‍රසිද්ධ වෙනවා.
අපි අතරේ " අරාබි නිසොල්ලාසය" නමින් ප්‍රසිද්ධ වුනේ අන්න ඒ කතා තමයි.

කොරෝනා සටනට ජපානෙන් එන අවිගන්

කොරෝනා සටනට ජපානෙන් එන අවිගන්................☣️☣️☣️☣️

        ජපානයේ "ටොයාමා කෙමිකල්" සමාගම විසින් නිපඳවා ඇති "අවිගන්"(Avigan-වෙළඳ නාමය) ඖෂධය වෛරස් උණ රෝගයන් සඳහා ලබාදෙන ඖෂධයක්.2014 උන්ෆ්ලුවෙන්සා සඳහා නිර්මාණය කල මෙහි ඖෂධ නාමය වන්නේ Favipiravir යන්නයි.

මෙම "අවිගන්" කොරෝනා සඳහා ප්‍රතිකාර කිරීමට යොදාගැනීම සාර්තක බව චීන සෞඛ්‍ය අංශ ප්‍රකාශ කරතිබෙනවා.ඒ පෙබරවාරි මාසසේ, චීනයේ වූහාන් සහ ශෙන්සෙන් ප්‍රදේශයන්හි රෝගීන් 340කට අවිගන් ලබාදී සිදුකල සායනික අධ්‍යනයේදී එම කොරෝනා රෝගීන් දින 4ක් වැනි කාලයක් ඇතුලත සුව අතට හැරුණු බව චීන විද්‍යා සහ තාක්ෂණ අමාත්‍යාංශ නිළධාරි "සැන්ග් ශින්මින්"(Zhang Xinmin) මහතා මාර්තු 17 දින ප්‍රකාශ කර ඇත.එමෙන්ම අවිගන් ලබාදුන් රෝගීන්ගේ පෙනහළුවල ස්කෑන් පිටපත්වලට අනුව ඔවුන් අතරින් 91% ක් පමණ පිරිසක යම් සාධනීය මට්ටමක් පෙන්නුම් කරන බවත් එම තත්වය අවිගන් ලබා නොදුන් රෝගීන්ගෙන් 62%කට පමණක් අත්වී ඇති බවත් චීන බලධාරී පවසයි.
                      විශේෂයෙන් කොරෝනා වෛරසය නිසා ඇතිවන නිව්මෝනියාව තත්වයට මෙයින් ප්‍රතිකාර සැලසෙන බවත් එහිදී කිසියම් හෝ අතුරු ආබාධයක් වාර්තා වී නොමැති බවත් චීන බළධාරීන් අවධාරණය කරයි.

RNA අණු දරන වෛරස සඳහා විශේෂිත මෙම ප්‍රති-වෛරස ඖෂධය වෛරසය ගුණනය වීමේදී දායක වන RNA polymerase එන්සයිම අක්‍රීය කර වෛරසයේ වර්ධනය නවතා දමයි.නමුත් ක්ෂීරපායී සෛලවල DNA හෝ RNA ප්‍රතිවලිත වීමට එයින් හානියක් නැත.

මෙම ඖෂධය ඉදිරි පැය 48 ඇතුලත ශ්‍රී ලංකාවට ගෙන ඒමට මේවන විට තීරණය කර ඇත.

*උපුටාගැනීම: Healthy Life kit facebook පිටුව
29-03-2020

චීනය සහ කොරෝනා මෙහෙයුම.

චීනය කොරෝනා මෙහෙයුම ජයගත්තේ මෙහෙමයි……………☣️☣️☣️

 ලෝකයේ මහද්වීප හතක් ඇත.එයින් කිසිඳු මිනිසෙකු නිත්‍ය වශයෙන් වාසය නොකර අයිස් මිදුනු සීතල ඇන්ටාට්ටික්  මහද්වීපය හැර අන් සෑම මහද්වීපයන් පුරා රාජ්‍යන් 199ක් වසාගනිමින් හා ලක්ෂ හයකට අධික මිනිසුන් ප්‍රමාණයක් ආසාදනය කරමින් හා බිලියන ගණනක් පීඩාවට පත් කරමින් මේ  වන විට අප වැඩි වැඩියෙන් කතාබහ කරන කොරෝනා වෛරසය නැත්නම් COVID-19 රෝගය පැතිරී හොස් හමාරය. සරලවම එය ලෝකයම ආක්‍රමණය කර හමාරය.

මෙම නව කොරෝනා වෛරසයේ උපන් බිම චීනය බව නොරහසකි.චීනයේ හුබෙයි පළාතේ  අගනුවර වන වූහාන් නගරය වෛරසය මුලින්ම පැනනැගී ස්ථානයයි.ඉන් පසු අසල්වැසි රාජ්‍යයන්ටත් ආසියාවේ අනෙක් රාජ්‍ය‍යන්ටත් පසුව යුරෝපයට හා ඇමරිකාවටත් කොරෝනා වෛරසය දායාද විනි.
වෛරසය චීනයෙන් උපත ලද්දා වුනත් වර්තමානයේ චීනය සාර්තකව වෛරසය මැඩපවත්වා ඇති අතර චීන වෛද්‍ය කණ්ඩායම් මේ වන විට සිය දැනුම අනෙක් රාජ්‍යයන් හා බෙදාගනිමින් සිටී. ඒ ලෝකයාම කොරෝනා සමග සටන් වදිනා අතරය.කොරෝනා මෙහෙයුමේදී චීනයේ සාර්තකත්වය වර්තමානය වනවිට මෙතරම් සාධනීය මට්ටමක තිබුනත් ආරම්භ වේදනාකාරී විය.එමෙන්ම මේ දක්වා ගමන් මගද වේදනාකාරී හා වෙහෙසකර එකක් විය.

2019 දෙසැම්බර් මාසයේ අග භාගයේ හඳුනා නොගත් නිව්මෝනියා තත්වයක් පිළිබඳ චීනයේ වූහාන්හි වෛද්‍ය කණ්ඩායම් විසින් මුල් වරට ප්‍රකාශ කරන ලදී.මෙසේ හඳුනාගත් රෝගීන්ගෙන් බහුතරය වූහාන්හි මාංශ වෙළඳ සැල් වෙත ආගිය අයවලුන් විය.එබැවින් මෙය අහාර ඔස්සේ එනම් සතුන්ගෙන් මිනිසුන්ට බෝවන රෝගයක් ලෙස අනුමාන කෙරුනු අතර මෙතරම් බරපතල තත්වයක් දක්වා වර්ධනය නොවේයැයි ඔවුන් විසින් අනුමාන කර ඇත.දෙසැම්බර් 12 දින සොයාගැනුනු පළමු කොරෝනා රෝගියාගේ සිට 2020 ජනවාරි 09 දින පළමු කොරෝනා මරණය දක්වාම මිනිසාගෙන් මිනිසාට කොරෝනා බෝ නොවන බව පිළිගැනුනද රෝගයේ තිඹිරිගෙය ලෙස සැලකුනු මාංශ වෙළඳපොළ හා කිසිඳු සම්බන්ධයක් නොවූ පළමු වරට මිය ගිය රෝගියාගේ  බිරිඳට මෙය ආසදනය වීමත් සමග එම මතය වෙනස් වීම ඇරඹෙන ලදී. ඒත් සමගම ඊට පසුදින එනම් ජනවාරි මස 10 දින වූහාන් නගරයෙන් පිටත එනම් ෂෙන්සෙන්  පළාතේ සම්පුර්ණ පවුලකටම කොරෝනා ආසාධනය වී ඇතිබව සොයාගැනින.මෙම පවුලේ සාමාජිකයන් පස් දෙනෙකුම වූහාන් ආගිය අය වූඅතර එම පවුලේම වුහාන් නොපැමිනි අයටද මෙම රෝගයම වැළඳී තිබිනි.ඒ අනුව මුල් වරට නව කොරෝනා වෛරසය මිනිසාගෙන් මිනිසාට බෝවන බව චීන සෞඛ්‍ය බළධාරීන් විසින් ජනවාරි 20 දින ප්‍රකාශ කරන ලදී.
         රෝගීන් ප්‍රමාණය ඉතා සීඝ්‍රයෙන් වැඩිවන ලකුණු පෙනෙන්නට තිබිනි.ජනවාරි 14 දින වන විට හඳුනාගත් රෝගීන් ගණන 41 පමණක් වුවත් දෙසතියක් ඉක්මවීමට මත්තෙන් වාර්තාගත රෝගීන් ගණන 2000කටත් අධික විය.මෙම සීඝ්‍ර වර්ධනයත් සමග හදිසි වසංගත තත්වයකට මුහුණ දීමට චීනය සූදානම් විය.ජනවාරි 20 දින ජාතිය ඇමතූ එරට ජනාධිපති ශී ජින්පින්(Xi Jinping) ජනතාවගේ ජීවිත ආරක්ශාව සහ සෞඛ්‍ය ප්‍රමුඛත්වයේලා සලකා කටයුතු කරන බව දනුම් දෙන ලදී.ඒ අනුව වසංගත තත්වය පාලනය කිරීමට ඉතා ඉක්මන් තීරණ ගැනීමට සිදුවිය.
       රෝගය වූහාන් පුරා ඉතාම සීග්‍රයෙන් පැතිරෙමින් තිබිනි.මුලින්ම මෙය වූහාන් පලාතෙන් බාහිර චීනය දක්වා පැතිරීයාව පාලනය කිරීම සිදුකල යුතුවිය.එය සැබැවින්ම අභියෝගාත්මකය.ඒ වූහාන් නගරය රට මැද්දට වෙන්න පිහිටීම නිසා මෙන්ම වූහාන් තුල මිලියන 14ක ජනතාවක් ජීවත් වන නිසායි.
     මේ වසරේ චීනයේ නව වසරෙ උදාව ගෙවීගිය ජනවාරි 25 දින එළඹීමට තිබිනි.මේ නව වසර සඳහා පිට පළාත්වල රැකියාවන් සහ අධ්‍යාපන කටයුතු සිදු කරන පිරිස් නැවත් සිය ගම්බිම් බලා පැමිණීමට නියමිතව තිබිනි.මෙව වාර්ශික සිදුවන ලොව විශාලම ආගමන විහමනය ලෙස සැලකේ.ඒ බිලියන තුනක් පමණ මේ මාසය පුරාවට සංචාර, විනෝද චාරියා මෙන්ම නිවාඩු ගතකිරීම වැනි වෙනත් වෙනත් කාර්යයන් සඳහාද රට පුරා සැරිසැරීම සිදුවන නිසාය.මෙවැනි අතිවිශාල ජනතා එක්රැස් වීම් සහ විශාල වශයෙන් සිදුවන ගමනාගමන් කොරෝනා පැතිරීයාමට ප්‍රබල ලෙසම බලපානු ලබයි.එබැවින් වහා ක්‍රියාත්මක වන පරිදි නව වසර උදාවට පෙර දින එනම් ජනවාරි 24දින චීන රජය වහා ක්‍රියාත්මක වන පරිදි මුළු වූහාන් නගරය මෙන්ම හුබෙයි ප්‍රාන්තයේ ඉතිරි නගර 15ත් එක් දිනක් ඇතුලත වසා දමා මිලියන 60ක ජනතාව නිවාස අඩස්සියට පත් කරන ලදී.ඒ ලංකාවේ ජනගහනය මෙන් තුන් ගුණයකි.
සියලුම සිනමාශාලා, කෞතුකාගාර ,පාසල් විශ්වවිද්‍යාල මෙන්ම බහුතරයක් සාප්පු සංකීරණ පවා සම්පුර්ණයෙන්ම වසා දමා ජනතාවට නිවෙස් තුලටම වී සිටින්නට උපදෙස් ලබා දෙන ලදී.
තවද සියලු පොදු ප්‍රවාහන සේවා නවතා දමන ලදී.ඒ පොදු ප්‍රහාණය රෝගයේ සීග්‍ර පැතිරීමට ප්‍රධානම සාධයකයක් බැවිනි.පුද්ගලික වාහන වුව ගමනාගමනය සීමාකරන ලද අතර අවසර ලත් වාහන කීපයකට හැර අනෙක් සියලු වාහන ගමනාගමනය සඳහා භාවිතා කිරීම නවතා තමන ලදි.මේ සියල්ල ඉතාම ඉක්මනනින් සිදුවිය.කොටින්ම වෛරසය මිනිසාගෙන් මිනිසාට බෝවන බව සොයාගෙන තෙදිනක් ඇතුලතදීම මෙම ක්‍රියාමාර්ග එරට රජය විසින් ගන්නා ලදී.එමෙන්ම මෙය ජාතික වගකීමක් ලෙස සලකා ඉතා හොඳ ජනතා සහයක්ද මේ සඳහා ලැබිනි.
තවද රටේ අනෙක් ප්‍රදේශවල පවා දැඩි ක්‍රියාමාර්ග ගැනිනි.
        නිදසුනක් ලෙස සාප්පු සංකීරණ හෝ සුපිරි වෙළඳසැල් වැනි ස්ථාන සඳහා ඇතුලුවන්නේ නම් අවම වශයෙන් මුහුණු ආවරණ පැළඳීම අත්‍යාවශ්‍ය බව නීතියෙන් පිළිගැනිනි.එමෙන්ම වෙනත් පොදු ස්ථාන තුලට ඇතුලු වීමේදී ශරීර උෂ්ණත්වය මැනීම සහ මද වශයෙන් හෝ උණ පවතින්නේ නම් වහා ප්‍රතිකාර සඳහා යොමු කරවන ලදී.තවද සෑම ස්ථානයකම ජනතාවගේ තොරතුරු එක් රැස් කිරීමේ මධ්‍යස්තාන පිහිටුවා මෑතකදී සිදු කල සංචාර, ආශ්‍රය කල පිරිස් පිළිබඳ හා රෝගය සඳහා අදාල වන සෑල තොරතුරක්ම එකතු කරගන්නා ලදී.
        ජනතාව දැනුවත් කිරීමේ වැඩකටයුතුද දිගින් දිගටම කරගෙන යන ලදී.රෝගයේ ස්වාභාවය , ව්‍යාප්තිය, බෝවීම සහ ආරක්ශා වීම වැනි කරුණු පිළිබඳව දැනුවත් කරල ලදී.ඒ අනුව ප්‍රතිකාර සඳහා යොමු විය යුත්තේ කිනම් අවස්තාවලදී යන්න සාමාන්‍ය ජනයා අවබෝද කරගනු ඇත.තවද චීනය පුරා නොමිලේ රෝගය පරික්ෂා කිරීමේ මධ්‍යස්ථාන පිහිටුවන ලද අතර පරීක්ෂණ ප්‍රතිපලය කුමක් වුනත් ඒ සඳහා කිසිඳු මුදලක් අය නොකිරිනි.නමුත් ඇමරිකාවේ නොමිලේ මෙවැනි පරීක්ෂණ සිදු කලද රෝගය වැළඳී නැතිබව තහවුරු වුවහොත් අදාල පරීක්ෂණය සඳහා වැයවූ මුළු මුදල ගෙවිය යුතුවේ.ඊට සාපෙක්ශව බලන කල චීනය ඉතාම සාධනීය සහ සාර්තක ලෙස රෝග නිවාරණ කටයුතු සඳහා අවතීර්ණ වී ඇත.
         වසංගත රෝගය බෝවීම වැළක්වීමට අදාල සියලු පියවර එසේ ගැනුනද රෝහල් වල දිනෙන් දින වාර්තා වන රෝගීන් ගණන ක්‍රමයෙන් වැඩිවෙමිනි තිබිනි.පවතින රෝහල් තුල ඉඩ පහසුකම් අඩු වෙමින් තිබුනි.ඒ සඳහා ඔවුන් සතුව වූ එකම විසඳුම වූයේ නව රෝහල් සෑදීමය.එබැවින් වහාම ක්‍රියාත්මක වන පරිදි කොරෝනා සඳහාම වෙන්වූ නව රෝහලයක් සෑදීමට පියවර ගැනින.චීනය සිය හමුදා ශක්තිය මේ සඳහා යොදවන ලදී.දින 10ක් වැනි ඉතාම කෙටි කාලයක් තුල වූහාන්හි ඉදිකල ඇඳන් 1000කින් සහ දැඩිසත්කාර ඒකක 30කින් යුතු අංගසම්පූර්ණ කොරෝනා රෝහලට අමතරව රට පුරා හමුදා රෝහල් 63ක රෝගීන් සඳහා ඇඳන් 3000ක් වෙන්කර් ඇත.එමෙන්ම හමුදා වෛද්‍ය නිළදාරීන් 10,000ක් කොරෝනා මර්ධන සටනට එකතු කරගන්නට එරට සෞඛ්‍ය අංශ පියවර ගැනින.මෙම වෛද්‍ය කණ්ඩායම් වසංගත රෝග සම්බන්ධ විශිෂ්ටයන් වන අතර SARS සහ Ebola වැනි වසංගත තත්ව පාලනය සඳහාද සහභාගී වී අත්දැකීම් ඇති පිරිසක් විය.එමෙන්ම චීන ගුවන් හමුදාවද තමන් සතු දියුණු ගුවන්‍ යානා  සමග නිරතුරු සූදානමින් සිටියහ.
            වෛරසය ශරීරගතවී රෝග ලක්ෂන පෙන්වීමට දින 14ක් ගතවන බැවින් ඉතා තදින් පාලනය කෙරුනු දින 14ක ස්වයං නිරෝධායන කාලයක් එරට රජය විසින් ප්‍රකාශයට පත්කල කරන ලදී.ඒ කාලය අතරතුර වෙනත් රෝග සඳහා ප්‍රතිකාර ලබාගනිමින් සිටි පිරිස් වෙත නිවසටම අවශ්‍යය ඖෂධ බෙදාහැරීමේ වැඩසටහනක්ද ක්‍රියාවට නංවන ලදී.සාමාන්‍යයෙන් ලබාදෙන එක් මසක මාත්‍රාව වෙනුවට මාස තුනකට සරිලන ඖෂධ මෙසේ බෙදාහරින ලදී.මෙසේ ඉතාම ඉක්මනින් මෙන්ම වඩා සාර්තක ලෙස චීනය සිය සෞඛ්‍යය ආරක්ෂන සහ ප්‍රවර්ධන කටයුතු දියත් කල අතර රෝගය මැඩලීමට එය ප්‍රබල මෙන්ම වඩාත් ධනාත්මක ලෙස බලපාන ලදී.
       තවද නිවෙස් තුලටම වී සිදුකරන ස්වයං නිරෝධායන කාලය තුල රැකියා ස්ථාන සියල්ලමත් වසා ඇති නිසා චීන ආර්තිකයට එල්ල වන මරු පහර වැළක්වීමට චීන ජනයා සිය නිවෙස්වලම සිට රැකියා කටයුතු සිදු කරන ලදී.චීන අධ්‍යාපන ආයතන සිය දේශන සහ අධ්‍යාපන කටයුතු අන්තර්ජාලය ඔස්සේ සිදුකල අතර ළමුන් හට නිවෙසටම වී අධ්‍යාපන කටයුතු සිදුකල හැකිවීමෙන් අධ්‍යාපන ක්ෂේත්‍රයේ සිදුවන කඩාවැටීම අවම කරගෙන ඇත.
                රෝගය ව්‍යාප්ත වීම ආරම්භ වූ මුල්ම අවදියේ රෝගයට හේතුවූ වෛරසය මෙතෙක් සොයාගෙන නොතිබුන නවතම වෛරසයක් නිසා රෝග පාලනය පිළිබඳ තිබූ අනවබෝධය නිසාවෙන් ආසාධිතයන් ගණන හා මරණ අනුපාතය සීග්‍රයෙන් ඉහල ගියද වෛරසය හඳුනාගැනීමෙන් පසු සිදුකල ප්‍රතිකාර සහ ඉහත දැක්වූ පරිදි සිදුකල දැඩි පාලනය සහ චීන ජනයාගේ වූ ස්වයං විනය නිසා චීනයට කොරෝනා පරාජය කල හැකි විය.නමුත් වර්තමානයේ වැඩිම කොරෝනා මරණ අනුපාතයක් ඇති රට වූ ඉතාලියේ තත්වය චීනයට හාත්පසින් වෙනස්ය.ඔවුන්ගේ දැඩි නොසැලකිමත්කමත් අධික සමාජශීලීකමත් නිසා රෝගය සීග්‍රයෙන් ව්‍යාප්ත විය.එමෙන්ම ඉතාලි සෞඛ්‍ය බලධාරීන්ද රෝගය උත්සන්න වන තෙක් එය නොසලකා හැර ඇති අතර රෝගීන් ගණන 1000 දක්වා වැඩිවන තෙක්ම කිසිඳු හදිසි ක්‍රියාමාර්ගයක් ගෙන නොමැත.එසේම ඉතාලි ජාතිකයන් සතු අධිතක්සේරුව නිසා ඔවුන් කොරෝනා අවතක්සේරු කර ඇති අතර ඉන් ප්‍රයෝජන ගත් කොරෝනා වෛරසය සිතාගැනීමටවත් නොහැකි ලෙස ඉතාලි සමාජය පුරා ව්‍යාප්ත වී තත්වය අතිශයින්ම දරුණු කර ඇත. ඉතාලියේ නොසැලකිමත් කමේ ප්‍රතිපලක් ලෙස මේ මස(මාර්තු) 20දින ඉතාලි ඉතිහාසයේ මෙන්ම ලෝක ඉතිහාසයේද එක් දිනක් තුල සිදුවූ වැඩිම මරණ ගණන වාර්තා විය.ඒ මරණ 627කි. ශ්‍රී ලාංකිකයන් සතු නොමනා හැසිරීම නිසා යම් දිනක ලංකාවද ඉතාලියක් වුවහොත් පුදුම විය යුතු නැත.
                          චීනය මෙන්ම භුතානයද සිය නිරෝධායන කටයුතු අතිවිශිෂ්ඨ ලෙස සිදුකරමින් පවතී.එය චීනයටත් වඩා වේගවත් පියවරකි.ඉන්දියාවේ සිට පැමිණි ඇමරිකානු ජාතික සංචරකයෙකු හට කොරෝනා වැලඳී ඇති බව පසුගිය 02 වෙනිදා සොයාගැනීමත් සමග සංචාරක කර්මාන්තය මත සිය ආර්තිකය ගොඩ නගා ඇති රාජ්‍යයක් වුනත් භුතානය විසින් රට තුලට සංචාරකයන් ඇතුලු විම පසුගිය 6 වනදා සිට සම්පූර්ණයෙන්ම තහනම් කර ඇත.භූතාන සෞඛ්‍ය බලධාරීන්ට අනුව අදාල රෝගියා තිම්පු නුවර රෝහලක් තුල නිරෝධායනය කර ඇත.එමෙන්ම එම සංචාරකයා ඇසුරු කල 90 දෙනෙකුත් , ඔහුගේ සහකරුත් , රියදුරා සහ මගපෙන්වන්නාත් මේ වන විට නිරෝධායන කටයුතු සඳහා යොමු කර ඇත.සංචාරකයන් සඳහා සති දෙකක තහනමක් පණවා ඇති අතරම තිම්පු නුවර සියළු පාසල්ද සති දෙකක් වසා ඇත.තවද සියලු සම්මේලනය සා සම්මන්ත්‍රණද සති දෙකකින් කල් දමා ඇත.ඒ අතරම ප්‍රජාව දැනුවත් කිරීමේ වැඩකටයුතුද ඉතා සාධනීය ලෙස සිදුවෙමින් පවතී.දැඩි අධීක්ෂණය , ආසාධන පිළිබඳ ප්‍රභව තක්සේරු කිරීම තුලින් තත්වය අවම කිරීම ඔවුන්ගේ අරමුණ වී තිබේ.එක් රෝගියෙක් හමුවීමත් සමගම භූතාමය ආරම්භ කල මෙම නොනවතින ප්‍රබල කොරෝනා මර්ධන සංග්‍රාමය ශ්‍රී                ලංකාවාසීන්ටද උගතහැකි දෑ බොහෝය.
ඉතාලියේ වසංගත දර්ශක ප්‍රස්තාරය(Epidemic Curve-කාලයත් සමග රෝගීන් ගණන දක්වන ප්‍රස්තාරය) සීනුවක හැඩය ගන්නා අතර එය තවම ඉහල යමින් ඇත.චීනයේ එහි සීග්‍ර නැග්මකින් ආරම්භ වුවද ඉන් පසුව අඩුවී ඇත.එය ඉතාලියට වඩා පැහැදිලිවම අඩු අගයකි.ශ්‍රී ලංකාවේ එම දර්ශයකට චීනයටත් වඩා පහත හෙලීමට සෞඛ්‍ය අංශ වෙහෙස වෙමින් සිටී.ඒ සඳහා අප සැම දයක විය යුතුය.

උපුට ගැනීම: Healthy Life kit facebook page(28-03-2020)

හැරී පොටර්ගේ කතාව

දොළොස් වතාවක් ප්‍රතික්ෂේප වූ හැරී පොටර්ගේ වාසනාවේ හිමිකාරිය............

(හැරී පොටර් කතාව පිටුපස ඇති අපි නොදන්න දේවල්)

              ලෝකයේ ජනප්‍රියම දුම්රිය වේදිකාව මොකක්ද කියලා ඇහුවොත් අනිවාර්යයෙන්ම ඕනේ කෙනෙක්ගේ උත්තරය වෙන්නේ  Platform 9 3/4.පුදුමයට වගේ මේක ඇත්ත ලෝකේ පවතින එකක් නම් නෙමෙයි.Platform  9 3/4 අපිට දැකගන්නට ලැබෙන්නේ  ලෝක ප්‍රකට Harry Potter චිත්‍රපටි මාලාවෙදී විතරමයි.චිත්‍රපටියට අනුව මේක තියෙන්නේ ලන්ඩනයේ King's Cross දුම්රිය ස්ථානයේ.Platform 9 3/4 සැබෑලෝකයේ නැතිවුනත් කිග්ස් ක්‍රොස් දුම්රිය ස්ථානය නම් ඇත්තටම ලන්ඩනයේ තියෙන තැනක්..Harry Potter බිහිවීමටත් මේ kings cross දුම්රිය ස්තානයේ සම්බන්දයක් තියෙනවා.ඒ සම්බන්දය ගොඩගැනෙගෙන්නේ Harry Potter චිත්‍රපටි මාලාවට මාදක වුනු Harry potter නවකතා මාලාව බිහිවීමේ කතාව එක්කයි.

හැරී පොටර් නවකතා මාලාව ලියැවෙන්නේ වන්නේ ජේ.කේ.රෝලින් විසිනුයි.1990 වසරේ දවසක මැන්චෙස්ටර් ඉඳල අපි අර කලින් කිව්ව  ලන්ඩනයේ කින්ග්ස් ක්‍රොස් දුම්රිය ස්ථානය දක්වා එමින් තිබූ දුම්රියක් තුල සිටියදී තමයි මායා පාසලක් ගැනත් එයට ඇතුලු වන කොලුගැටයෙක් ගැනත් පුංචි පුංචි අදහස් කීපයක් රෝලින්ගේ මනස ඇතුලේ උපදින්නේ..ඒ තමයි හැරී පොටර් බිහිවීමේ මුල්ම බීජය පැලවීම.ඉන් පසු ඉදිරි වසර පහ පුරාම ඇය වෙහෙසෙන්නේ සම්පූර්ණ හැරී පොටර් කතාව ගොඩනගන්නයි.

ජේ.කේ.රෝලින් උපදින්නේ 1965 ජූලි 31 වෙනිදා එංගලන්තයේ ග්ලූසෙන්ටර්ශයර් හිදීයි.ඒ දියණියන් දෙදෙනෙකුගෙන් සමන්විත පවුලේ වැඩිමල් දියණිය විදියටයි.රෝලින්ගේ පියා රෝල්ස් රොයිස් සමාගමේ ගුවන්‍ යානා ඉංජිනේරුවෙකු වූ අතර මව විද්‍යාගාර තාක්ෂණික ශිල්පිණියක් වුනා.නමුත් ඇගේ මව ස්නායු පද්ධතිය ආශ්‍රිත රෝගයක් හේතුවෙන් 1990 වසරේදී මිය යනවා.

රෝලින්ගේ මවගෙන් සහ පියාගෙන් ලැබුන දායාහයක් විහියට පොත් කියවන්න රෝලින්ට තිබුනේ පුදුම ආසාවක්.කොටින්ම ඇය හැදී වැඩුනේ පොත් අතරයි.පොඩි කාලෙ ඉඳන්ම රෝලින්ට ඕනෙ වුනේ ලේඛිකාවක් වෙන්න.ඉතින් අවුරුදු හයේදී රෝලින් හාවෙකු ගැන කතාවක් කියැවෙන  "Rabbit" නම් සිය පළමු ග්‍රන්තය රචනා කරා.එමෙන්ම රොබට් ගැල්බ්‍රෙයිත් (Robert Galbraith) නම් ව්‍යාජ නාමයකින් අභිරහස් කතා මාලාවක්ද ඇය විසින් රචනා කර තිබෙනවා.
1982 ඔක්ස්ෆර්ඩ් විශ්වවිද්‍යාල ප්‍රවේශ විභාගයට මුහුණ දුන්නත් එයින් ඇය අසමත් වීමෙන් ඔක්ස්ෆර්ඩ් ඇතුලත් වීමේ අවස්තාව ඈ වෙතින් ගිලිහී යනවා.නමුත් Exeter විශ්වවිද්‍යාලයට ඇතුලත් වී ප්‍රංශ භාශාව සහ සම්භාව්‍ය විශයන් සඳහා කලා උපාදියක් හිමි කරගන්නවා.මවගේ මිය යෑමත් , වසරකට පමණක් සීමා වූ පළමු විවාහයේ බිඳ වැටීමත් ආදී හේතූන් මත ඇය දැඩි මානසික පීඩනකට සහ ආතතියකට ලක් වූ අතර ඉන් මිදීම සඳහා ඇය කලේ නිරන්තරව ලිවීමයි.විවාහය දෙදරා ගිය , රැකගැනීම දියණියක් සිටි එමෙන්ම රැකියාවද නොතිබූ රෝලින් උපාධිය හිමි කරගෙන වසර හතක් යන තෙක්ම ජීවීතයෙ අසාර්තක ඇයෙක් වුනා.

1990 දුම්රිය ගමන අතර තුර ඇතිවූ සිතුවිල්ල එනම් ඇයගේ ජීවිතය වෙනස් කල සිතුවිල්ල ඇය එම දුම්රිය ගමන අවසන් වී නිවෙසට පැමිනි වහාම කොලයට සටහන් කරගන්න අමතල කලේ නෑ.තම දියණියගෙ ජීවිතය උඩුයටිකුරු කරන නිර්මාණය ඇයගේ ලියන මේසයේ කොල අතර මෙලෙස බිහිවෙමින් පවතින බව එම වසරේ දෙසැම්බරයේ මිය යන තෙක්ම රෝලින්ගේ මව දැනගෙන නම් හිටියේ නැහැ.මවගේ මියයෑමෙන් සහ පළමු විවාහයේ බිඳ වැටීමෙන් පසු සිය අතදරුවා සමග ස්කොට්ලන්තයේ සිටි රෝලින්ගේ සහෝදරිය වෙත ඇය යන්නේ සූට්කේසයක පුරවාගත් හැරී පොටර් හි මුල්ම පරිච්ඡේද තුන ලියූ කඩදාසි කීපයද සමගයි.

රැකියාවක් නොමැති බැවින් රජයෙන් ලබාදෙන දීමනා මත පමණක් යැපෙමින් ජීවිතය ගැටගසා ගැනීමේ කාලයක් ඇයට තිබිනි.හැරී පොටර් ටිකෙන් ටික ගොඩ නැගෙන්නේ මේ කාලයේදීයි.ලියූ මුල්ම පරිච්ඡේද ත්‍රිත්වය නියෝජිතයන් කීපදෙනෙකු වෙත යැවූ අතර ඉන් එක් අයෙකු පමණක් කතාවේ ඉතිරි ටික කියවීමේ කැමැත්තෙන් සිටින බව දන්වා ඇයට ලිපියක් එවීය.බලාපොරොත්තු දල්වාලූ එම ලිපිය ජීවිත කාලය පුරාවටම තමන් ලද හොඳම ලිපිය බව රෝලින් විසින් පසු කලෙක ප්‍රකාශ කර ඇත.
                           ඉහත නියෝජිතයාගේද උදව් ඇතිව මුල් පරිච්ඡේද තුන රැගෙන ඇය පොත් ප්‍රකාශකයින් සොයා ගියාය.එලෙස ප්‍රකාශකයින් දොලොස් දෙනෙකු වෙත ගියත් එම දොලොස් දෙනාම එය විකාර අදහසක් සේ සලකා මුද්‍රණය කිරීම ප්‍රතික්ෂේප කලද එක්තරා කුඩා ග්‍රන්ත ප්‍රකාශකයෙකු වූ "බ්ලූම්ස්බෙරි ප්‍රකාශකයෝ" විසින් ඇයගේ මෙම නවකතාව මුද්‍රණය කිරීමේ වගකීම භාරගන්නා ලද අතර එය ජීවිතයේ ඔවුන් ගත් හොඳම තීරණය වනු ඇතැයි ඔවුන්ද සිතන්නට නැතුව ඇත.රෝලින්ගේ මෙන්ම බ්ලූම්ස්බෙරි ප්‍රකාශකයින්ගේ ඉරණම වෙනස් කල මේ තීරණය ගැනුනේ අවුරුදු අටක පුංචි ගැහැණු ළමයෙකුට පින් සිද්ද වෙන්නටයි.ඒ බ්ලූම්ස්බෙරිහි සේවය කල බැරී කන්නිහැම් මහතා රෝලින් විසින් ලබාදුන් මුල් පරිච්ඡේද ත්‍රිත්වය එවකට අට හැවිරිදි වූ සිය දියණියට කියවීමට ලබා දුන් පසු ඉතා ඉක්මනින්ම එය කියවා තමන්ට එහි ඉතිරි කොටසද කියවීමට අවශ්‍යය බවට සිය දියණිය විසින් පෙරැත්ත කල පසු ළමුන් විසින් මෙම කතාව ආදරයෙන් වැළඳගනු ඇතැයි පූර්ව අනුමානක් කල බැරී කනින්හැම් මහතා සිය බ්ලූම්ස්බෙරි සමාගම එය මුද්‍රණ කටයුතු භාරගත යුතු බවට තීරණය කිරීමයි.
             කාන්තාවක් විසින් රචනා කල ග්‍රන්තයක් පිරිමි ළමුන් විසින් කියවීම ප්‍රතික්ෂේප කරනු ඇතැයි සිතූ ප්‍රකාශකයින් ඇයට ඇයගේ සැබෑ නම වෙනුවට වෙනස් නමකින් ප්‍රකාශනය කල යුතු බවට යෝජනා කළහ.ඒ අනුව ජොඈන් රෝලින් යන ඇයගේ නමට "කැත්ලීන්" නම් ඇයගේ මිත්තණියගේ නාමට එක් කොට ජොඈන් කැත්ලීන් රෝලින් හෙවත් ජේ.කේ.රෝලින්(J.K.Rowling) යන නාමය ඇය විසින් නිර්මාණය කරල ලදී.J.K.Rowling නමින් ඇයගේ ප්‍රතම Harry Potter නව කතාව වූ Harry Potter and the Philosopher's Stone ග්‍රන්තය 1997 වසරේදී එලෙස ප්‍රකාශයට පත් කෙරිනි.මේ සඳහා මුලින්ම ඇයට ලැබුණු අත්තිකාරම් මුදල වූයේ යුරෝ 15000ක් පමණි.කෙසේ වෙතත් ළමා කතා පොත් විකිණීම අවම මට්ටම පවතින බැවින් ඇයට ඒ වන විට සිදු කරමින් තිනූ රැකියාව නොනවත්වා කරගෙන යන බවටද අදාල ප්‍රකශන සමාමෙන් උපදෙස් ලැබිනි.නමුත් ප්‍රකාශයට පත්වී සති කීපයකින්ම පිටපත් සියල්ල විකිණී අවසන් වෙමින් නවකතාව ඉතා සාර්තක විය.කතාව ළමුන් අතර පමණක් නොව වැඩිහියන් අතරද වේගයෙන් ජනප්‍රිය විය.ඒ වන විය J.K.Rowling යනු කාන්තාවක් බව තවදුරටත් රහසක් නොවුනු අතර එය පොතේ විකිණීමටද බාධාවක් නොවීය.එමෙන්ම ඇමරිකාව ඇතුලු වෙනත් රටවල්ද එම නවකතාව සියරටේ ප්‍රකාශන අයිතිය ඉල්ලා සිටියහ.Harry Potter and the Sorcerer's Stone නමින් ඇමරිකාවේදී ප්‍රකාශයට පත් කෙරුනේ එයයි.ඉන් පසු පිළිවෙලින් කතාවේ ඉතිරි ග්‍රන්තද එළි දැක්විනි.ඒවා නම් ,

1998 : Harry Potter and the Chamber of Secret.

1999 : Harry Potter and the Prisoner of   
            Azkaban

2000: Harry Potter and the Goblet of Fire

2003: Harry Potter and the Order of the
           Phoenix

2005: Harry Potter and the Half Blood Prince.

2007: Harry Potter and Deathly Hallows

පිළිවෙලින් 1997 ,98 සහ 99 යන වසර වල මුල් ග්‍රන්ත ත්‍රිත්වය එලිදැකිවූ පසු එම වසර තුලදී පමණක් රෝලින් හට ඩොලර් මිලියන 480ක වත්කමක් උපයා දීමය පිටපත් මිලියන තිස්පහක් විකිණුනු මුල් ග්‍රන්ත තුන පමණක් සමත් වි තිබිනි.
තවද 2000 වසරේ නිකිත් සිව්වන ග්‍රන්තය ඒ දක්වා ලෝක ඉතිහාසයේ පැය 24ක් ඇතුලත වේගයෙන්ම විකිණූ පොත බවට පත්විය.එහි මුල් පිටපත් මිලියන 5.3ට පසුව අධික ඉල්ලුම මත තවත් පිටපත් මිලියන 1.8ක් මුද්‍රණය කිරීමට සිදුවිය.

නමුත් එම වාර්තාවම නැවත බිඳ හෙලමීට හය වෙනි ග්‍රන්තය වූ Harry Potter and the Half Blood Prince සමත්විය.ඒ එක්සත් රාජධානිය තුල පමණක් පිටපත් මිලියන 6.9ක් පළමු පැය 24 තුල විකිණීමත් සමගයි.නමුත් එම වාර්තාවද නැවතත් අවසාන නවකතාව වූ Deathly Hallows මගින් බිඳ වැටිනි.අදටත් ලොව වැඩිම ප්‍රමාණයක් පෙර-ඇණවුම් කල ග්‍රන්තය බවට Deathly Hallows නම් දරා සිටී.

හැරී පොටර් කතාමාලාවේ එන බොහොමයක් චරිත සහ සිදුවීම් රෝලින්ගේ පුද්ගලික ජීවිතය හා සබැඳි චරිත සහ අත්දැකීම් ඇසුරෙන් බිහි වූ ඒවාය.
කතාවේ ප්‍රධාන චරිතය වන හැරී පොටර් චරිතය ඇයගේ ළමාවියේ මිතුරෙකු මෙන්ම අසල්වැසියෙකු වූ "ඉයන් පොටර්" නම් තැනැත්තා ඇසුරෙන් නිර්මාණය කරන ලදී.

හැරීගෙ මිත්‍රයා රොන් වීස්ලිගේ චරිතය ගොඩනැගෙන්නේ රෝලින්ගේ හොඳම මිත්‍රයා වූ "ශෝන් හැරිස්" නම් බ්‍රිතාන්‍ය හමුදා නිළදාරියාගේ චරිතය මතයි.රෝලින්ට අනුව රොන් හැරීට දක්වන පක්ෂපාතීවය සහ දැඩි මිත්‍රත්වයට සමාන සැලකීමක් ශෝන් හැරිස් විසින් තමා වෙත දක්වනු ලබන අතරම ලේඛිකාවක වීමේ සිහිනය පිළිබඳ මුලින්ම ඈ පවසා ඇත්තෙද මේ ශෝන් හැරිස් හටයි.එසේ පැවසූ විට ඇය ලේඛිකාවක් ලෙස සාර්තක වන බව පවසා ඇයව ඒ සඳහා දිරි ගන්වා ඇත්තේ ඔහුය.ඒ නිසාම හැරී පොටර් දෙවන ග්‍රන්තය රෝලින් විසින් ශෝන් හැරිස්ගේ නමට පුද කර ඇත.

දක්ෂ බුද්ධිමත් කාර්යක්ෂම හ'මයිනි ග්‍රේන්ජර්ගෙ චරිතයට පාදක වෙන්නෙ රෝලින්ගේම ළමා කල චරිතයයි.තමන් කුඩා කල විඳි පීඩනය හමුවේ ජීවිතයට මුහුණ දුන් ආකාරය හා නිතරම පොත් කියවමින් දැනුම රැස් කල ආකාරයට අර්ධ මායා ලේ සහිත පවුලක ඉපදුනු හ'මයිනිද ශුද්ධ මායා පවුල් වලින් එල්ල වන පීඩනය හමුවේ ඉදිරියට යන්නට දරණ ප්‍රත්‍න්‍යයෙන් එය අපිට පැහැදිලිය.

කතාව පුරාවට දුශ්ටයාව සිට නමුත් අවසානයේදී වඩාත් ආදරණීයම චරිතය බවට පත්වන මහාචාර්ය ස්නෙප්ගේ චරිතය බිහිවන්නේ රෝලින්ගේ පාසල් කල අකමැතිම ගුරුවරයෙකු වූ ඇයගේ පාසලේ රසායන විද්‍යා ආචාර්ය "ජෝන් නෙට්ල්ශිප්"ගේ චරිතය අනුවයි."ස්නේප්"(Snape) ලෙස ඇය තෝරාගන්නා නාමය වන්නේ එංගලන්තයේ ඓතිහාසික ප්‍රදේශයක් වූ Suffolk හි පිහිටි Snape නම් ග්‍රාමයේ නමයි.

හැරි පොටර් කතාමාලව ගොඩනැගීමේදී නිර්මාණය කල මුල්ම චරිතවලින් එකක් වන යෝධ හැඩ්‍ර්ඩගේ චරිතය රෝලින් විසින් ගොඩගනගන්නේ 'හාලි ඩේව්ඩ්සන්'(Harley-Davidson) යතුරු පැදි මත නැගී රටපුරා සැරිසරන විශාල රැවුල් වවාගත් ලෙදර් ජැකට් පැලඳි Hells's Angels යතුරුපැදි සංගමේ සාමාජිකයන් සිතින් මවාගෙනයි.

ප්‍රේක්ෂකයා , පාඨකයා මෙන්ම රෝලින් පවා ඉතා අඩු කැමැත්තක් දැක්වූ තවත් දුෂ්ට චරිතයක් වූ රෝස පැහැ ඇඳුමකින් සැරසුරු "ඩොලරස් අම්බ්‍රිජ්" ගේ චරිතය ගොඩනගන්නේ රෝලින්ගේ පාසලේ ගුරුවරියක් අනුවයි.

හැරි පොටර්ගේ නපුරු නැන්දනියගේ චරිතය ගොඩනැගෙන්නේ රෝලින්ගේ මිත්තණිය වූ ෆ්‍රේඩාට අනුවයි.

           ඇල්බස් ඩම්බල්ඩෝර්ගේ චරිතය රෝලින් විසින් ගොඩනගන්නේ ඇයගේ ප්‍රාතමික පාසලේ විදුහල්පති වරයාව සිහියේ තමාගෙනයි.

       එමෙන්ම හැරී පොටර් දෙවන චිත්‍රපටියේදී අපි දකින රොන්ගේ පියාගේ පියාඹන කාර් රථය ගැන අදහස රෝලින්ගේ සිතට එන්නේ රොන්ගේ චරිතයට පාදක වූ කලින් සඳහන් කල ශෝන් හැරිස් සතුව තිබූ Ford Anglia මෝටර් රථය නිසයි.

                තවද තෙවන චිත්‍රපටියේදී අපිට දක්නට ලැබෙන භූත ආරක්ෂකයිනෙ හෙවත් Dementorsලව නිර්මාණය කිරීමට තමා විශාදයෙන් පෙළුන තරුණ කාලයේ ලද අත්දැකීම් තමාට උපකාර වූ බව ඇය පවසා තිබෙනවා.
එමෙන්ම තමාගේ මව මිය යෑම නිසා තමා ලද ආතතිය හා අත්දැකීම් දෙමාපියන් අහිමි වූ හැරී පොටර් චරිතය නිර්මාණයට රෝලින් හට උපකාර වී ඇත.තවද ඇය උගත් ප්‍රංශ හා සම්භාව්‍ය විශයන් පිළිබඳ දැනුම කතාමාලාවේ සඳහන් මන්තර නිර්මාණය කිරීමට දායක වී ඇත.

නවකතා මාලාව සාර්තකවයට පස්වෙමින් තිබියදී 1998දී Warner Bros.සමාගම හැරි පොටර් පළමු නවකතාව සිනමාවට නැගීමට අවසරය ලබාගත් අතර 2001 නොවැම්බර් 16දින පළමු හැරීපොටර් චිත්‍රපටය නවකතාවේ නමින්ම එළිදැක්විනි.ඒ අනුව ඊට පසුව පිළිවෙනි 2002 , 2004 , 2005 ,2007 සහ 2009 යන වසරවලදී ඉතිරි චිත්‍රපටි එළිදැක්වූ අතර අවසාන චිත්‍රපටිය කොටස් දෙකකට පිළිවෙලින් 2010 සහ 2011 දී එළිදැක්විනි.
ලෝ ප්‍රකට චිත්‍රපටි අධ්‍යක්ෂක ස්ටීවන් ස්පිල්බර්ග් විසින් පළමු චිත්‍රපටය අධ්‍යක්ෂනය  කිරීමට පැමිනි නමුත් එය ඔහු විසින් පසුව අත්හැර දමා ඇත.

චිත්‍රපටි සියල්ලේ තිරරචනාව ස්ටීව් ක්ලෝස් විසින් සිදු කලද ඉතිරි නවකතා දෙක සහ චිත්‍රපට පිටපත් අතර පරස්පරතාවක් ඇතිවීම වළක්වා ගැනීමේ අරමුණින් පස්වන චිත්‍රපටියේ පිටපත් රචනය සඳහා රෝලින්ද මැදිහත් වී ඇත.ප්‍රධන නළුවා වූ හැරීගේ චරිතයට රඟපාන "ඩැනියෙල් රැඩ්ක්ලිෆ්" පවා චිත්‍රපටි මාලාවේ අවසානය කෙබඳු වේදැයි නොදැන සිටියද  ස්නෙප්ගේ චරිතය රඟපෑ ඇලන්‍ රික්මන්ටත් , හැඩ්‍රිඩ්ට රඟපෑ රොබී ක්ල්ට්‍රේන්ටත් ඔවුනොවුන්ගේ චරිතවලට අනාගතෙදී අත්වන ඉරණම් කෙබඳු දැයි රෝලින් විසින් රහසිගතව පවසා තිබීම විශේෂිතය. තවද අවසාන චිත්‍රපටයේ නිශ්පාදිත වරියක් ලෙසද රෝලින් දායක වී ඇත. හැරී පොටර් අවසන් වූ පසු , රෝලින් විසින් 2002දී රචනා කරන ලද Fantastic Beast නවකතා මාලාව ඇසුරෙන්ද චිත්‍රපටි මාලාවක් Warner Bros සමාගම විසින් මේ වන විට නිර්මාණය කරමින් පවතී.Fantastic Beast: Where to Find them සහ Crimes of Grinderwald නමින් එහි පළමු චිත්‍රපටි දෙක මේ වන විට එළිදක්වා ඇති අතර එහි තවත් චිත්‍රපටි ත්‍රිත්වයක් එළිදැකීමට නියමිතය.

අධික දරිද්‍රතාවයෙන් හා මානසික පීඩනයෙන් ජීවත්වූ මෙම බ්‍රිතාන්‍ය ජාතික ලේඛිකාව හැරීපොටර් විශ්වයට ස්තූතිවන්ත වන්නට මේ වන විට බ්‍රිතාන්‍ය මහරැජිණටද වඩා වැඩි වත්කමක් උපයා ඇත.2004 වසරේදී ෆෝර්බ්ස් සඟරාව විසින් ග්‍රන්තකරණයෙන් බිලියනපති තත්වය ලද ලොව ප්‍රථම තැනැත්තා බවට රෝලින්ව නම් කෙරිනි.නමුත් සුභසාධන කටයුතු සඳහා ඩොලර් මිලියන 160ක් පරිත්‍යාගය කිරීමෙන් පසුව ෆෝබ්ස් සඟරව විසිනි ඇයව බිලියන පතියන්ගේ ලැයිස්තුවෙන් ඉවත් කලහ.2013 වසරේදී බ්‍රිතාන්‍යයේ බලවත්ම කාන්තාවන් අතරින් 13 වන තැන ඇයට හිමිවිය.එසේම 2017 වසරේදී Sunday Times Rich List වාර්තාවට අනුව රෝලින් සතුවූ වත්කම යුරෝ මිලියන 650කි.තවද එම වාර්තාවට අනුව වාර්ශිකව ඇය ලබන ආදායම යුරෝ මිලියන 72ක් හෙවත් ඩොලර් මිලිනය 95කි.වර්තමානයේ ඇයගේ වත්කම ඇමරිකානු ඩොලර් බිලියනය සීමාව අත්කරගෙන හමාරය.එය ලොව දෙවනියට ධනවත්ම නළුවා වන ශාරුක් කාන්ටද , සුපිරි පාපන්දු ක්‍රීඩකයන් වන ක්‍රිස්ටියානෝ රෝනාල්ඩෝ සහ ලයනල් මෙසීටද වඩා වැඩි වත්කමකි.

--  සංකල්ප ගුණතිලක✍️ --
          (27-03-2020)

චීනයෙන් මතුවූ නව වෛරසය-Hantavirus

කොරෝනාට පසුව චීනයෙන් තවත් මාරාන්තික  වෛරසක්…………☣️☣️☣️

  චීනයේ යූනාන්(Yunnan) පලාතෙන් තවත් වෛරසයක් ගැන අසන්න ලැබී තිබෙනවා.ඒ නිරිතදිග චීනයේ යූනාන්හි මිනිසෙකු ඉකුත් සඳුදා දින(මාර්තු 23) අභිරහස් ලෙස මියයාමත් සමගයි. යූනාන් සිට නැගෙනහිර ශැන්ඩොන්(Shandong) පළාත දක්වා ගමන් කරමින් සිටිනා අතරතුර ඔහු ගමන් කරමින් සිටි බස් රථය තුලදීම අදාල තැනැත්තා මියගොස් ඇති අතර පසුව සිදුකල පරීක්ෂණ වලදී මොහුට Hanta virus නම් වෛරසය ආසාධනය වී ඇතිබව සොයාගැනෙනවා.ඒ අනුව ඒ මොහොතේ බසයේ සිටි ගණනින් 32ක් වූ අනෙක් මගීන්ද වහාම වෛද්‍ය පරීක්ෂණ සඳහා යොමු කර තිබෙනවා.නමුත් ඔවුන්ට අදල වෛරසය ආසාධනය වී තිබේදැයි යන්න තවමත්(24 දිනට) නිළ වශයෙන් ප්‍රකාශ කර නැහැ.කෙසේවුවත් මීයන් විශේෂයක් මාර්ගයෙන් පැතිරෙන මෙම වෛරසය කොරෝනා වෛරසයට සාපෙක්ශව  මිනිසාගෙන් මිනිසාට බෝ වීමේ සම්භාවිතාව පවතින්නේ ඉතාම පහල මට්ටමකයි.

#මොකක්ද මේ Hanta Virus ?

Hantaviridae නම් වෛරස පවුලට අයත් මෙම වෛරසයද කොරෝනා , HIV  සහ ඉබෝලා වෛරස මෙන්ම RNA අණු දරණ වෛරසයක්.
මෙම Hanta වෛරසය මී කුළයේ සාමාජිකයන්ට ආසාධනය වන වෛරසයකි.එසේ ආසාධනය වුවත් ඔහුන් තුල මෙමගින් රෝග ඇතිකිරීමක් සිදුනොවේ.

#ඉතිහාසය ?

මුලින්ම 1913 වසරේ රක්තපාතය ඇති කරමින් මුත්‍රා පද්ධතියට බලපෑම් කරන HFRS රෝගය පිළිබඳ වාර්තාවන්නේ රුසියානු වෛද්‍ය වාර්තාවලයි.ඒ නැගෙනහිර සයිබීරියාවේ පැතිරුනු වෛරසක් පිළිබඳව වාර්තායි.
නමුත් ඒ සමානම රෝගයක් පිළිබඳ විස්‍තර ක්‍රි.ව.960 තරම් ඈත අතීතයේ චීන වෛද්‍ය වාර්තා වලින් හමුවේ.

ශ්වසන පද්ධතිය ආශ්‍රිත බලපෑම් ඇතිකරන HPS රෝගය මුලින්ම සොයාගැනුනේ ඇරිසෝනා , නම මෙක්සිකෝ , කොලරාඩෝ සහ ඌටා ප්‍රාන්ත අවට නි‍රිතදිග ඇමරිකානු ප්‍රදේශයන්ගෙනි.ඒ 1993 වසරේදීය.හඳුනා නොගත් ශ්වසන රෝගයක් ලෙස වාර්තා වු පසුව සිදුකල පරීක්ෂණ වලනි HPS හෙවත් Hantavirus Pulmonary Syndrome ලෙස සොයාගැනින.

Hantavirusයට එම නම ලැබී ඇත්තේ කොරියානු ඉතිහාසයේ බිහිවූ ශ්‍රේෂ්ටතම වෛරසය වේදියෙකු වූ වෛද්‍ය හෝ-වෑන්ග්-ලී විසින් 1976දී  මුල් වරට වෛරසය  හඳුනාගත් දකුණු කොරොයාවේ Hantan ගංඟා නිම්නය නිසායි.

#මිනිස්සුන්ට බෝවෙන්නේ කොහොමද ?

Hanta virus මිනිසාට බෝවන්නේ එම වෛරසය ආසාධනය වූ මී කුලයේ සාමාජිකයන්ගෙනි.එම මීයන් විසින් බැහැරකෙරෙන මල මුත්‍රා මගින් හෝ එම මීයන්ගේ සපාකෑම් වලට ලක්වීමෙන් මෙය මිනිසාට වැළඳිය හැක.ආසාධිත මීයන්ගේ මල මුත්‍රා සමග පිටවන වෛරස වාතය සමග මුසුවී අප හුස්ම ගැනීමේදී ආශ්වාස වාතය තුලින්ද ශරීරයට ඇතුලුවිය හැක.

#මාරාන්තිකද ?

Hanta Virus පවුලේ සාමාජිකයන්ගෙන් කීපදෙනෙක් මිනිසාට මාරාන්තික වුවද අනෙකුත් සාමාජිකයන්ගෙන් මිනිසාට රෝග සෑදෙන්නේ නැත.මිනිසාට එලෙස ආසාධනය කල හැකි වෛරස නිසා රුධිර සංසරණ පද්ධතිය , මුත්‍රා පද්ධතිය සහ ශ්වසන පද්ධතිය ආශ්‍රිත රෝග ඇතිකරයි.
එම රෝග නම් ,

* මුත්‍රා පද්ධතියට හානිකරමින් රක්තපාත තත්වයක් ඇති කරන Hantavirus hemorrhagic fever with renal syndrome (HFRS)

* ශ්වසන පද්ධතිය ආශ්‍රිත බලපෑම් ඇතිකරන Hantavirus Pulmonary Syndrome හෙවත් Hantavirus Cardiopulmonary Syndrome.(HPS).

* මීට අමතරව HFRS රෝගතත්වයේම ප්‍රබේදයක් වන Nephropathia epidemica(NE).මෙය එංගලන්තය හැර අනෙකුත් යුරෝපානු රටවලින් හමුවේ.

ඉහත මුත්‍රා පද්ධතියට හානි කරන(HFRS සඳහා හේතුවන) හැන්ටා වෛරසය බොහෝවිට ආසියාවෙන් හා යුරෝපයෙන් හමුවී ඇති අතර එය "පැරණි ලෝකයේ හැන්ටා වෛරසය"(Old world Hantavirus) ලෙස හඳුන්වන අතර , ශ්වසන පද්ධතියට හානි කරන(HPS සඳහා හේතුවන) වෛරසය " නව ලෝකයේ හැන්ටා වෛරසය"(New world Hantavirus) ලෙසද හඳුන්වයි.එය බහුලවම ඇමරිකානු මහද්වීප අවටින් හමුවේ.

#වැඩිපුරම හැදෙන්න පුළුවන් කාටද ? 

*වැඩිම අවධානමක් ගොවියන්ට ඇත.
*වනාන්තර ආශ්‍රිතව මෙන්ම අපිරිසිදු හෝ ග්‍රාමීය පරිසරන් තුල ජීවත් වන පුද්ගලයින්
*කඳු නගින්නන්

#රෝග ලක්ෂන ?

මුලින්ම : උණ
                  මස් පිඬු වේදනාව
                  ශීතල ගතියක් දැනීම

දින කීපයකට පසු : හිසරදය
                                      වියළි කැස්ස
                                      වමනය
                                      හුස්ම ගැනීමේ අපහසුව

#ආරක්ශාව වීම.

*මී වසුරු හා බහිස්‍රාවී ද්‍රව්‍ය වලින් ඈත්වී සිටීම.

*අපිරිසිදු පරිසර පද්ධති තුල සිදුකරන කාරියන් වලදී අතාවරණ මුව ආවරණ වැනි ආරක්ෂිත ක්‍රමවේද භාවිතය.

උපුටා ගැනීම: Healthy Life kit facebook පිටුව ඇසුරෙනි.

https://www.facebook.com/773202026175155/posts/1493573307471353/

ශල්‍යකර්ම ඉතිහාසයේ අරුම පුදුම වැඩක්...

තමන්ගෙ ශල්‍යකර්මය තමන්ම කරගත්තු අරුම පුදුම දොස්තර...........

රුසියානු ජාතික විසිහත් හැවිරිදි ශල්‍ය වෛද්‍යවරයෙකු වූ ලියෝනිඩ් රෝගොසොව් (Leonid Rogozov) කියන්නේ ශල්‍ය වෛද්‍ය ඉතිහාසයේ හරි අමතු වැඩක් කරපු කෙනෙක්.

1960 - 1961 යන වසරවල මොහු ඇතුලු කණ්ඩායමක් ඇන්ටාට්ටික් කලාපයේ ගවේෂන චාරිකාවක් අතරතුරදී මොහුගේ උණ්ඩකපුච්වයේ ආසාදනයක් (Appendicitis) ඇතිවනවා.නමුත් මෙම කණ්ඩායමේ ශල්‍ය වෛද්‍යවරයෙකු නොමැති නිසා(හිටපු එකම ශල්‍ය වෛවෛද්‍යවරයා තමන් නිසා) තම උණ්ඩකපුච්වය ඉවත් කිරීමේ ශල්‍ය කර්මය(Appendectomy) ඔහු විසින්ම සිදු කරනවා.
චායාරූපයෙන් දැක්වෙන්නේ එම ඓතිහාසික අවස්‍තාවයි.

ලියෝනිඩ් ඉවනෝවිච් රෝගසොව්(Leonid Ivanovich Rogozov) නම් මොහු උපත ලබන්නේ සෝවියට් දේශය චීනයෙන් සහ මොංගෝලියාවෙන් වෙන් කෙරුනු දේශසීමාවට නොදුරින් වු මායිම් ගම්මානයකයි.ඒ 1934 මාර්තු 14 වෙනිදායි.ඉන් වසර නමයකට පසු එනම් 1943 දී ඔහුගේ පියා දෙවන මහා ලෝක සංග්‍රාම භුමියේදී මියගියෙය.

1953 දී සිය මූලික අධ්‍යාපන කටයුතු හමාර කල මොහු එවකට Leningrad Pediatric Medical Institute නම් වූ වර්තමාන ශාන්ත පීටර්ස්බර්ග් වෛද්‍යවිද්‍යාලයට ඇතුලු විය.1959 වෛද්‍යවරයෙකු ලෙස උපාධිය ලබාගත් ඔහු ශල්‍ය වෛද්‍යවරයෙකු වීම සඳහා පුහුණු වීම් අරඹන ලදී.නමුත් 1960 සැප්තැම්බර් මසයේ එම වැඩිදුර අධ්‍යාපන කටයුතු නවතා දැමූ එවකට විසිහය හැවිරිදි වූ මොහු හයවන සෝවියට් අන්ත්ලාන්තික් ගවේෂණ කණ්ඩායම (6th Soviet Atlantic Expedition) සමග එක් වූයේ වෛද්‍යවරයෙකු ලෙසයි.මොහු විසින් අරුම පුදුම සැත්කම සිදුකලෙ මෙම ගවේෂණ චාරිකාව අතර්තුරදීයි.

1962 නැවත රුසියාව බලා පැමිණි පසු රුසියාවේ ගෙනින්ග්‍රෑහි රෝහල් රැසක වෛද්‍යවරයෙකු ලෙස සේවය කල ඔහු 1986 වසරේ සිට සිය මරණය දක්වාම ශාන්ත පීටර්ස්බර්ග් ශ්වසන රෝග පරීක්ෂණ අධ්‍යනායතනයේ සැත්කම අංශයේ ප්‍රධානිය ලෙස සේවය කලේය.

ශ්වසන රෝග පරීක්ෂණ අධ්‍යනායතනයේ සේවය කලද මොහුට මිය යන්නට සිදුවූයේද ශ්වස්න පද්ධතිය ආශ්‍රිත රෝගයක් නිසාමය.ඒ අනුව 2000 වසරේ සැප්තැම්බර් 14 දින ශාන්ත පීටර්ස්බර්ග් නුවරදී මොහු මියගියේ පෙනහලු පිළිකාවක් වැළඳීම නිසය.මියයන විට
ඔහුගේ වයස අවුරුදු 66කි.

-- සංකල්ප ගුණතිලක --
        (2020.03.24)

සූර්ය කොරෝනාවේ කතාව

කොරොනා වෛරසයට නම ආපු සූර්ය කොරෝනා ගැන දන්නවද..

ඉලෙට්‍රෝන අන්වීක්ශයෙන් බලන විට සූර්ය කොරෝනාවක හැඩය ගන්නා නිසා කොරෝනා වෛරසයට එම නම ලැබුනු බව අප දන්නා කරුණකි.ඇත්තටම මේ සූර්ය කොරෝනා යනු මොනවාද..???

සූර්ය කොරෝනාව යනු සූර්යා වටා ඇති වායු ස්තරයේ පිටතම කොටසයි.සූර්ය පෘෂ්ඨයේ සිට සැතපුම් මිලියන 5ක් පමණ ඈතට මේවා විහිදෙන අතර සූර්යාගේ චුම්භක ශේස්ත්‍රයේ ප්‍රබලතාව අනුව එහි විශාලත්වය තීරණය වේ.
1724 වසරේදී ප්‍රංශ-ඉතාලියානු තාරාකා විද්‍යඥයෙකු වූ Giacomo F. Maraldi විසින් මුලින්ම මෙම සූර්ය කොරෝනා නිරීක්ෂණය කල අතර 1809 ස්පාඤ්ඤ ජාතික තාරකා විද්‍යඥය Jose Joaquine de Ferrer විසින් "කොරෝනා" නම් නාමය මෙම ආලෝක කදම්භ වලට ලබාදෙන ලදී.
     
      හිරුගේ මතුපිටට සාපේක්ෂව ඉතා අඩු ඝනත්වයකිනුත් ඉතා ඉහල උශ්ණත්වයකිනුත් සමන්විතය.මේ අඩු ඝනත්ව තත්වය නිසා සූර්ය කොරෝනාවේ දීප්තිය අඩු බැවින් සාමාන්‍ය අවස්තාවලදී මෙය සූර්ය රශ්මිය තුල සැඟවී පවතී.එම නිසා මෙය නොපෙනේ.නමුත් පූර්ණ සූර්යග්‍රහණයක් වන අවස්තාවකදී මෙය දැකගත හැකිය.එසේ දිස්වන්නේ සූර්යා සහ පෘතුවිය අතරට පැමිණෙන චන්ද්‍රයා මගින් හිරුගේ ප්‍රබල දීප්තිමත් රශ්මි කදම්බ වලක්වාලන බැවිනි.එවිට සුදු පැහැති කොරෝනාව දැක ගත හැක.සූර්ය කොරෝනාවේ ඝනත්වය සූර්යා මතුපිටට වඩා මිලියන 10 කින් පමණ අඩු අතර උශ්ණත්වය සිය ගුණයකින් පමණ වැඩිය.එනම් කොරෝනාවේ උශ්ණත්වය කෙල්වින් මිලියන දෙකක් පමණ වේ.මෙසේ උශ්ණත්වය ඉහල යාම පිළිබඳ නිවැරදි අදහසක් විද්‍යාඥයින් සතුව නොමැති නමුත් එක් පිළිගත හැකි මතයක් වන්නේ සූර්යා මතුපිටින් ඉතා ඉහළ ශක්තියක් රැගත් පදාර්ත කොටස් කොරෝනාවේ කෙලවර දක්වා ගමන් කර ඒවා සතු ඉතා ඉහළ ශක්තිය තාපය ලෙස පිටකරමින් පුපුරා යන බවයි.මේවා "Heat Bombs'" නම් වේ.

මෙම සූර්ය කොරෝනා වලින් ප්‍රධාන වශයෙන්ම විශ්වයට විකිරණ මුදාහරින අතර ඒවා ප්‍රධාන වශයෙන්ම "X කිරණ" බවට මේ වන විට සොයාගෙන ඇත.

    එමෙන්ම අපගේ සෞරග්‍රහ මණ්ඩලය පුරා ඇදීයන සූර්ය සුළං(Solar Wind) ඇතිවන්නේද මේ සූර්ය කොරෝනා වල බලපෑමෙනි.සූර්ය කොරෝනාවේ කෙලවරෙහි ඇති අයණීකරණය වූ අංශූන් කොරෝනාවේ ඇති ඉහල උශ්ණත්වය නිසා චාලක ශක්තියක් ලබා ගනී.එම චාලක ශක්තිය සූරියාගේ ගුරුවාකර්ශණ බලයෙන් මිදී එම අංශු වලට සූර්ය සුළං ලෙස අපගේ සෞරග්‍රහ මණ්ඩලය පුරා විහිදී යාමට උපකාර වේ.පෘතුවියේ චුම්භක ගෝලයේ හැඩය මෙන්ම වල්ගාතරුවක වල්ග කොටසද සාදන්නේ මේ සූර්ය සුළං මගිනි.ඒවා හැමවිට සූර්යාට විරුද්ධ දෙසය විහිදේ.

 - සංකල්ප ගුණතිලක -
      ( 2020 - 01 - 28 )

ආදරයේ අසම්මතය.

ආදරයට වයස ප්‍රශ්ණයක්ද ?

1993 අවුරුද්දේ ප්‍රංශයේ La Providence උසස් පාසලේදී හරි අපූරු හමුවීමක් සිද්ද වෙනවා.ඒ එවකට තෙදරු මවක් වූ එම පාසලේම නාට්‍ය ගුරුවරිය සහ ඇයගේ දියණියගේ පන්තියේ හිටිය අවුරුදු 15ක පිරිමි ළමයෙක් අතරයි.තමන්ට වඩා අවුරුදු 25කින් වැඩිමල් වුනත් මේ ගුරුවරිය ගාව පුංචි කොල්ලගේ හිත නවතිනවා.ඉතින් ටිකක් කල් ගෙවිලා යද්දී ගුරුගෝල සම්බන්දය ප්‍රේමයක් දක්වා දුරදිග යන කතාවක් බවට පත්වෙනවා...

කොලුවගේ දෙමාපියන් දෙන්නව වෙන් කරන්න නොකළ දෙයක් නෑ...බැරිම තැන අන්තිමේදී කොලුවව පාසලෙස් අස්කරලා වෙන පාසලකට ඇතුලත් කරනවා.
වයස බාධාවක් නොවුන ප්‍රේමයකට දුර බාධාවක් වෙයිද?..දෙන්නව දුරස් කරල තිබ්බත් ප්‍රේමය තාම එහෙමමයි.ඉතින් දවසක් මේ කොලු ගැටයා තමන්ගේ මේ අපූරු ප්‍රේම වන්තියට විවාහ යෝජනාවක් කරනවා..ඒත් එතකොට කොල්ලගේ වයස යන්තම් අවුරුදු 17ක් විතරයි.ඉතින් කොහොම බඳින්නද...
ඒදා මේ දෙන්නට විවාහ වෙන්න බැරිවුනත් ඊට අවුරුදු ගානකට පස්සේ මේ දෙන්නා විවාහ වෙනවා.ඒ 2007 දී.එදා ඉඳන් අද දක්වාම මේ දෙන්නා නෝනයි මහත්තයයි.❤
     තමන්ට වඩා අවුරුදු 25කින් වැඩිමල් කාන්තාවක් සමග ප්‍රේමයෙන් බැඳුන මේ පිරිමි දරුවා පස්සෙ කාලෙක ලෝකෙ බලවත්ම රාජ්‍යයන් පහෙන් එකක නායකයා වෙනවා..ඒ වෙන කවුරුත් නෙමේ..වර්තමාන ප්‍රංශ ජනාධිපති "එම්මෑනුවෙල් මැක්‍රෝන්"...ඉහත චායාරූපයේ ඉන්නේ එතුමා සහ එතුමාට වඩා විසිපස් වසරකින් වැඩිමල් එතුමාගේ බිරිඳ වන "බ්‍රිජට් මැක්‍රෝන්" ආර්යාව.වර්තමානයේ එම්මෑනුවෙල් මැක්‍රෝන්ගේ වයස අවුරුදු 42ක් වෙනකොට බ්‍රිජට් මැක්‍රෝන් ආර්යාවට අවුරුදු 66ක්.

   -සංකල්ප ගුණතිලක-
    (24/03/2020)

සහෝදර දේශපාලනය ගැන අතීත කතාවක්

එකම රටක එකවර රටේ උඩම පුටුදෙකේ ඉඳගත් අයිය මලෝ..👑️👑️
(දේශපාලන නොව ඉතිහාස කතිකාවතකි)

වර්තමානයේ ශ්‍රී ලංකාවේ ජනාධිපති හා අගමැති එකම පවුලේ සහෝදරයින් දෙදෙනෙක් බව අපි හැමෝම දන්න කරුණකි.මෙසේ එකම පවුලේ සහෝරයින් දෙදෙනෙක් රටක ජනාධිපති හා අගමැති වීම මෑතකාලීන ලෝක දේශපාලනයේ දුර්ලභ අවස්තාවකි.නමුත් මෙය එසේ පත්වූ ප්‍රතම අවස්තාව නොවෙයි.මින් පෙර එකම එක අවස්තාවක් පමණක් සහෝදරයන් දෙදෙනෙක් මෙලෙස ජනපති-අගමැති සුංසයෝගය වූ අවස්තාවක් ලෝක දේශපාලන වේදිකාවේ හමුවේ. ඒ Lech Aleksander Kaczyński හා Jarosław Aleksander Kaczyński යන නිවුන් සහොදරයන් දෙදෙනායි.ඒ රට නම් පෝලන්තයයි.

  Lech Aleksander Kaczyński( ලෙශ් ඇලෙක්සැන්ඩර් කට්‍රින්ස්කි) සහ Jarosław Aleksander Kaczyński(යරොල්ස්වහ් ඇලෙක්සැන්ඩර් කට්‍රින්ස්කි) 1949 ජූනි 18 වර්සෝ නුවර උපත්ති ලැබූ නිවුන් සොහොයුරන් වේ. මොවුන් දෙදෙනා කුඩාකල "The two who stole the moon" නමින් 1962 නිශ්පාදිත සිනමා පටයකටද සිය රංඟන දායකත්වය ලබාදී ඇත. වර්සෝ විශ්වවිද්‍යාලයට ඇතුලත් වූ මෙම නිවුන් සොහොයුරන් දෙදෙනාම "නීතිය හා පරිපාලනය" පිළිබඳ උපාධි ලබාගෙන ඇති අතර පසු කාලීනව ආචාර්ය උපාධිද හිමි කරගෙන ඇත.

Lech Kaczyński(ලෙශ් කට්‍රින්ස්කි) විසින් 2000 සිට 2001 දක්වා එරට අධිකරණ අමාත්‍යවරයා ලෙස කටයුතු කල අතර 2002 නොවැම්බර් 18 සිට 2005 දෙසැම්බර් 22 දක්වා වර්සෝ නුවර නගරාධිපති ලෙස සේවය කරන ලදී.
ඉන්පසුව 2005 පැවති ජනාධිපතිවරණයෙන් ජයගෙන 2005 දෙසැම්බර් 23 බලයට පත්වූයේ පෝලන්තයේ සිව්වන ජනාධිපතිවරයා ලෙසයි.2010 අප්‍රේල් 10 දින අවාසනාවන්ත ගුවන් අනතුරකින් මියයන තෙක්ම ඔහු එරට ජනාධිපති ලෙස සේවය කරන ලදී.

ලෙශ් කට්‍රින්ස්කිගේ සොහොයුරා වූ Jarosław Kaczyński (යරොල්ස්ව කට්‍රින්ස්කි) වර්තමානයේ පෝලන්තයේ "Law & Justice" පක්ෂයේ නායකයා මෙන්ම 1991 - 1993 හා 1997 සිට මේ දක්වා පෝලන්ත පාර්ලිමේන්තු මන්ත්‍රී කෙනෙක්ද වේ. 2005 සැප්තැම්බර්  පාර්ලිමේන්තු මැතිවරණයේදී ඔහු "Law and Justice" පක්ෂයේ අගමැති අපේක්ෂකයා ලෙස ඉදිරිපත් වූ අතර එයින් ජයගත්තද ඔහු විසින් අගමැති තනතුර බාර ගැනීම ප්‍රතික්ෂේප කරන ලදී.ඒ එම වසරේම ඔක්තොම්බර් මස පැවැත්වීමට නියමිතව තිබූ ජනාධිපතිවරණයේ අපේක්ෂකයෙකු ලෙස ඉදිරිපත් වීමට සිට සිය සහෝදරයාට ඉන් ගැටලුවක් වේයැයි සිතමිනි. එම නිසා එම පක්ශයේම අයෙකු වූ Kazimierz Marcinkiewicz අගමැති ලෙස පත්වන ලදී.
කෙසේනමුත් පසුව Kazimierz Marcinkiewicz හා කට්‍රින්ස්කි අතර ඇතිවූ භේදබින්න භාවය හේතුකොට ගෙන 2006 ජූලි 7 දින Kazimierz Marcinkiewicz සිය අගමැති ධූරයෙන් ඉල්ලා අස්විය. එයින් පුරප්පාඩු වූ අගමැති ධූරයට එවකට ජනාධිපති වූ ලෙශ් කට්‍රින්ස්කි විසින් සිය නිවුන් සහෝදරයා වූ යරොල්ස්ව කට්‍රින්ස්කි ව ජූලි 10 පත්කල අතර ජූලි 14 අගමැති ධූරයේ දිවුරුම් දීමේ සිට 2007 නොවැම්බර් 16 මහමැතිවරණ පරාජය දක්වා ඔහු එරට අගමැති ලෙස ක්‍රියාකරන ලදී. මෙසේ එකම පවුලක අයිය මලෝ දෙදෙනෙක් එකම රටක ජනාධිපති හා අගමැති ලෙස ක්‍රියාකල ප්‍රථම අවස්තාව මෙය වන අතර නිවුන් සොහොයුරන් විසින් එවැන්නක් කල ප්‍රතම හා එකම අවස්තාවද වෙයි.

2010 ගුවන් අනතුරකින් ජනාධිපති ලෙශ් කට්‍රින්ස්කි මියගිය යාමෙන් පසු , 2010 ජූලි 20 දින පැවැත්වූ ජනාධිපති වරණයට වැඩබලන ජනාධිපති වූ Bronisław Komorowskiට එරෙහිව එවකට විපක්ෂ නායක වූ යරොල්ස්ව කට්‍රින්ස්කි තරඟ කලද පළමු වටයේ චන්ද ගණන් කිරීමෙන් ප්‍රතිවාදී අපේක්ෂකයා ලබාගත් 41.54%ට පිළිතුරු ලෙස 36.46%ක් හා දෙවන වටයේ චන්ද ගණන් කිරීමෙන් 53.01%ට  46.99%ක් ලෙස ලබා පරාජය විය.

සංකල්ප ගුණතිලක

කොරෝනා වෛරසය ගැන දැනගමු💡🔎

මොකක්ද මේ කොරෝනා වෛරසය...

Coronaviridae නම් වෛරස පවුලේ සාමාජිකයෙක් වන මෙම නවතම වෛරසය අනෙක් කොරොනා වෛරස සේම ශ්වසන පද්ධතිය සහ ආහාර මාර්ගයේ ඉහළ කොටස් වලට බලපෑම් කරන මාරාන්තික වෛරසයකි.ඉලෙක්ට්‍රොනික අන්වීක්ශයෙන් බලන විට සූර්‍ය කොරෝනාවක හැඩය ගන්නා නිසා "කොරෝනා වෛරස" ලෙස නම් ලැබී ඇති මෙය RNA අණු දරන වෛරස කාණ්ඩ අතරින් විශාලම වෛරසයද වේ.මේ සඳහා මේ වන විට කිසිඳු ඖෂධයක් සොයාගෙන නොමැත.
          මුලින්ම කොරෝනා වෛරසයක් හඳුනා ගන්නේ 1960 වසරෙ වන අතර එය "Human corona virus 229E" නම් වූ අතර මෑත කාලීනව එනම් 2002-2003 වසර වල චීනය ඇතුලු ආසියාතිල රටවල් පුරා පැතිරුනු Sever acute respiratory syndrome මෙන්ම 2012 දී මැදපෙරදිග කලාපයේ ඔටුමස් හා ඔටු කිරි පරිභෝජනය නිසා ඇතිවූ Middle East Respiratory Syndrome සඳහාද හේතු වූයේ මෙම වර්ගයේම වෛරස වන අතර ඒවා පිළිවෙලින් SARS-CoA සහ MERS-CoA නම් කර ඇත.
   * SARS-CoV වසංගතය :-
        ආරම්භය - චීනය
        ව්‍යාප්තිය - රටවල් 30ක් පුරා
        ආසාධනයන් - 8,437
        මරණ - 813

* MERS-CoV වසංගතය :-
        ආරම්බය - සෞදි අරාබිය
        ව්‍යාප්තිය - රටවල් 27ක් පුරා
        ආසාදනයන් - 2,494
        මරණ - 858

මෙම වර්ගයේ වෛරස වර්ග 6 ක් මේ වන විට සොයාගෙන ඇති අතර හත්වන වෛරසය ලෙස වර්තාමනයේ චීනය කේන්ද්‍ර කරගෙන පැතිරී යන "2019-nCoV" ලෙස නම් කර ඇති කොරෝනා වෛරසය හැඳින්විය හැකියි.

# මිනිස්සුන්ට ආවේ කොහොමද..??

දැනට පිළිගැනෙන මතය අනුව චීනයේ වෝහාන් පළාතේ ඇති මාංශ වෙලඳ සැල්වලින් මෙම වෛරසය පැන නැග ඇති බවයි. විද්‍යාඥයන් මිනිසා අතර පවත්නා කොරෝනා වෛරසයේ ජාන සැකැස්ම සතුන් අතර පවත්නා වෛරස සැකැසුම් ගණනාවක් සමග සංසන්දනය කල පසුව වඩාත් ආසන්නම සැකැස්ම සර්පයින් අතර පවතින බව සොයාගෙන ඇත.ඒ අනුව මෙය Chinese Cobra නම් නයි විශේශයකින් පැමිනි බව පිලිගනී.

#පැතිරෙන්නේ_කොහොමද...??
 
මෙම වෛරසය පැතිරෙන්නේ ප්‍රධාන වශයෙන්ම සුලඟ මගිනි.ආසධිත තැනැත්තෙක් කහින විට ඔහුගේ/ඇයගේ මුවින් හා නාසයෙන් පිට වන සෙම අංශු වල මෙම වෛරසය අඩංගු වේ.
මදුරු දශ්ටනයන් ආදියෙන් මෙම ශරී‍ර ගත නොවේ.

#රෝග ලක්ෂන මොනවද...??

සාමාන්‍යයෙන් වෛරසය ශරීර ගතවූ පසුව රෝග ලක්ෂන මතුවීමට දින 10 - 14 ක් අතර කාලයක් ගතවේ..
රෝග ලක්ශන වන්නේ :-
    1). උණ.
    2). හුස්ම ගැනීමේ අපහසුතාව.
    3). කැස්ස.
    4). අක්මාව හා වකුගඩු ක්‍රියාකාරීවය
          අඩපන වීම.
    5). නිව්මෝනියාව.

ආරාක්ශා වෙන්නේ කොහොමද..??

1). සබන් යොදා දෑත් පිරිසිදු කරන්න(තත්පර
      20ක් පමණ)
2). නොසේදූ දෑත් වලින් ඇස් , නාසය , මුඛය
     ඇල්ලීමෙන් වලකින්න.
3). සෙනග ගැවසෙන ස්තාන වලින් තරමක්
      ඈත් වී සිටින්න.
4). උණ හෙම්බිරිස්සාව සෑදී ඇති අයගෙන්
     තරමක් ඈත් වී සිටින්න.

න්‍යශ්ටික බෝම්මයේ අතුරුඵල

දහසක් හිරු දෙස බැලීමේ පාපය...!!

   ගිනිගහන මද්දහනේ කාටද පුළුවන් සූර්යා දිහා බලන්න..? බෑ නේද...එකක් දිහා බලන්න බැරි අපි ඒ වගේ දහසක් දිහා එකවර බැලුවොත් මොනව වෙයිද..මේ රූපයේ තියෙන්නේ අන්න එහෙම බලපුවාම වෙන දේ තමා...මේ ජපාන ජාතික දැරියගේ දෑස් 1945 දී ජපානයට එල්ල කල පරමාණු බෝම්බ පිපිරීමේදී නිකුත් වූ අධික ආලෝක ධාරාවට නිරාවරණය වෙලා..ඒ දීප්තිය සූර්යන් දහසක් එකවර පෑයීමේදී නිකුත්වන දීප්තියට සමානයි.
ඉතින් මේ ඇස් අන්තිමට දැකපු දර්ශණය තමයි ඒ...පරමාණු බෝම්බ ප්‍රහාරයෙන් දිවිබේරුනු එහෙත් මේ වගේ වෙනත් සංකූලතාවන්ට භාජනය වූවන් ජපානයේ හඳුන්වන්නේ Hibakusha කියලා..මේ දැරියත් හිබකුශාවරියක්..තනි හිරුදිහා බලන්න බැරි අපිට හිතාගන්නවත් පුළුවන්ද මේ දැරියගේ දෑස් සාක්ෂිදරපු අවසාන දර්ශනග ගැන.

හයිඩ්‍රිජන් බෝම්බයේ කතාව

විනාශකාරීත්වයේ දූතයා...හෙවත් පරමාණු බෝම්බ මෙන් දහස් ගුණයකින් ප්‍රබය හයිඩ්‍රජන් බෝම්බයේ කතාව.........

1945 ඇමරිකාව විසින් පරමාණු බෝම්බ හෙලා ජපානයේ හිරෝෂිමා සහ නාගසාකි නගර විනාශ කර දැමුවේ සැනෙකින් ඒවා අලු ගොඩවල් බවට පත් කරමිනි.එසේ දෙවන ලෝක සංග්‍රාමය නිමා වූයේ ඒ වන විට මිනිසා විසින් නිපඳවා තිබූ භයානකම අවියේ ප්‍රචණ්ඩත්වය ලොවට පෙන්වමිනි.
දෙවන ලෝක යුද්ධ අවසානයෙන් පසු සෝවියට් දේශය සහ ඇමරිකාව අතර බල අරගලයේ සීතල යුද්ධය ආරම්භ විය.මෙහි ප්‍රතිපලයක් ලෙස 1949 සැප්තැම්බර් 23 දින සෝවියට් දේශයත් සාර්තක පරමාණු බෝම්බ අත්හදා බැලීමක් කසකස්තානයේදී සිදු කරන ලදී.රුසියානුවන්ගේ එම අත්හදා බැලීම පිළිබඳ දැන ගත් ඇමරිකානුවන් තම රට සතුව තිබූ න්‍යශ්ටික අවි පරමාධිපත්‍යය බිඳ වැටුනු බව දැනගෙන පරමාණු බෝම්බයට වඩා විනාශකාරී සුපිරි අවියක් නිර්මාණය කිරීමේ අවශ්‍යතාවෙන් පෙලිනි.කෙසේවෙතත් මේ පිළිබඳ මතබේද පැනනැගෙමින් පැවති අවධියක ඇමරිකානු න්‍යශ්ටික ව්‍යාපෘතියේ විද්‍යාඥයෙකු ලෙස සිටි රුසියානු ඔත්තුකරුවෙකු හමුවීමත් සමගම එම විනාශකාරී අවිය නිපඳවීමේ අවශ්‍යතාව ඇමරිකානුවන්ට තවතවත් තදින් දැනෙන්නට විය.ඒ අනුව එවකට ජනාධිපති "හැරී ටෲමන්"ගේ ආශිර්වාදය යටතේ ඉහත අවිය නිර්මාණය කිරීමේ කටයුතු ඇරඹිනි.නමුත් පරමාණු බෝම්බය මෙන් සිය දහස් ගුණයකින් ප්‍රබල හරිඩ්‍රජන් බෝම්බයක් නිර්මාණය කිරීම මූලික අදහස ජනාධිපති ටෲමන්ගේ නියෝගයට පෙර සිටම රෝපණය වෙමිනි තිබිනි.

දෙවන පරම්පරාවේ විනාශකාරී න්‍යශ්ටික අවියක් වන හයිඩ්‍රජන් බෝම්බ පළමු පරම්පරාවේ අවියක් වන පරමාණු බෝම්බ වලට වඩා අතිශය බිහිසුනුය.
හයිඩ්‍රජන් බෝම්බ යනු හිරෝෂිමා නාගසාකි පරමාණු බෝම්බ මෙන්ම න්‍යශ්ටික ප්‍රතික්‍රියාවක ප්‍රතිපලයක් ලෙස ඉතා විශාල ශක්තියක් නිපඳවන බෝම්බයක් වන අතර එය හිරෝශිමා නාගසාකි පරමාණු බෝම්බ මෙන් 1000 ගුණයකින් පමණ ප්‍රබලය.සාමාන්‍යයෙන් හයිඩ්‍රජන් බෝම්බයක් පිපිරවීමට පරමාණු බෝම්බයක් පිපිරවිය යුතු බව පැවසේ.ඒ හයිඩ්‍රජන් බෝම්බයේදී සිදුවන සංඝට්ටන ප්‍රතික්‍රියාව සඳහා ඉතා ඉහල ශක්තියක් අවශ්‍ය බැවිනි.එම ශක්තිය පරමාණු බෝම්බයක් පිපිරවීමේදී සිදුවන විඝටන ප්‍රතික්‍රියාවෙන් සැපයේ.
හයිඩ්‍රජන් බෝම්බයක් තුල සිදුවන්නේ හයිඩ්‍රජන් (H) හි සමස්තානික වන ඩියුටීරියම් හා ට්‍රිටියම් න්‍යශ්ටි එකිනෙක් ගට්ටනය කර හීලියම්(He) සෑදීමයි.අපගේ සූර්ය ඇතුලු අනෙක් තාරකාද ශක්තිය සපයා ගන්නේ මෙම ප්‍රතික්‍රියාව ආදාරයෙනි.හයිඩ්‍රජන් බෝම්බයක ප්‍රබලතාව එයින්ම තීරණය කල හැක.

හයිඩ්‍රජන් බෝම්බයක් පිපිරවීමත් සමග ඇතිවන විද්‍යුත් චුම්භක විකිරණ දාරාව නිසා විශාල ගිනි ජාලාවක්(Fireball) අහසට පැන නගින අතර පිපිරීමත් සමග ක්ශනිකව නිකුත් වන supersonic පීඩන කම්පන තරංගයට හසුවන පණ ඇති නැති ඕනෑම දෙයක් ක්ශනිකව දූවිලු බවට පත් කරයි.එමෙන්ම මෙහිදී නිකුත් වන අධික තාපය නිසා මිනිසෙකු වුනත් පහසුවෙන් දිය වී යා හැක.මෙහිදී කෙල්වින් මිලියනයක පමණ උශ්ණත්වයක් ජනිත වෙයි.
පරමාණු බෝම්බයක් හා සසඳන විට හිරෝෂිමා නාගසාකි පරමාණු බෝබ්ම මගින් නිකුත් වූ TNT ටොන් 1000ක් එකවර පුපුරා යාමේදී නිකුත් වන ශක්තිය වෙනුවට හයිඩ්‍රජන් බෝම්බයකදී TNT ටොන් 1,000,000(මිලියනයක්) එකවර පුපුරා යාමේදී නිකුත් වන ශක්තියට සමාන ශක්තියක් නිකුත් වේ.
වර්තමානයේදී ඇමරිකාව , රුසියාව , මහා බ්‍රිතාන්‍ය , චීනය , ප්‍රංශය සතුව මෙම තාක්ෂණය ඇති අතර මෑතකදී උතුරු කොරියාවද සාර්තක හයිඩ්‍රජන් බෝම්බ අත්හදා බැලීමක් සිදු කර ඇත.

      ජපානයට හෙලූ පරමාණු බෝම්බ නිපඳවන ලද්දේ ඇමරිකාවේ මෑන් හැටන් ව්‍යාපෘතිය යටතේය.මෙහිදී පරමාණු බෝම්බ නිපඳවන අතරවාරේයේම වඩා ප්‍රබල හයිඩ්‍රජන් බෝම්බය නිපඳවීම පිළිබඳ න්‍යායාත්මක  මූලික සැකැසුම් ආරම්භ කරන ලදී.ඒ ජපානයට පරමාණු බෝම්බ හෙලීමටත් පෙර අවධියකයි.
20 වන ශතවර්ෂයේ මුල් භාගයේදී අපගේ සූර්යා ඇතුලු අනෙකුත් තාරකා වලින් අධික ශක්තියක් නිපඳවන්නේ එවායේ මධ්‍යයේ සිදුවන තාපන්‍යශ්ටික ප්‍රතික්‍රියා දාමයක් මගින් බව සොයාගෙන තිබුනු අතර මිහිපිට එවැනි තාපන්‍යශ්ටික ප්‍රතික්‍රියාවක් සිදුකිරීම පිළිබඳ විද්‍යාඥයන්ට අදහසක් නොමැතිවූයේ එවැනි ප්‍රතික්‍රියාවක් ආරම්භ කිරීමට අවශ්‍යය ඉහල උශ්ණත්වයක් සහ පීඩනයක් මිනිසාට නිර්මාණය කල නොහැකි නිසාය.නමුත් මෑන්හැටන් ව්‍යාපෘතියෙන් පරමාණු බෝම්බය නිපඳවූ පසු එය තවදුරටත් න්‍යායාත්මක කරුණක් නොවී ප්‍රායෝගික කරුණක් බවට පත්විය.ඒ පරමාණු බෝම්බයක් තුල සිදුවන විඝටන ප්‍රතික්‍රියාවකින් (ස්කන්ධයෙන් ඉහල  පරමාණු න්‍යශ්ටි විඝටනය වී ස්කන්ධය අඩු න්‍යශ්ටි සහිත පරමාණු සෑදීම) නිකුත් වන තාපයෙන් සූර්යා ඇතුලු අනෙකුත් තාරකා මධ්‍යයෙ සිදුවන තාපන්‍යශ්ටික ප්‍රතික්‍රියාවක් ආරම්භ කල හැකිබව "එන්රිකෝ ෆර්මි" නම් විද්‍යාඥයා විසින් මෑන්හැටන් ව්‍යාපෘතියේ සේවය කල ආචාර්ය එඩ්වඩ් ටෙලර්(Edward Teller) හට ප්‍රකාශ කිරීමෙන් පසුවයි.
ඒ අනුව "එඩ්වඩ් ටෙලර්" සහ ඔහුගේ සහයක වූ පෝලන්ත ගණිතඥය "ස්ටැන්ස්ලෝ උලාම්"(Stanislow Ulam) සමග එක්ව හයිඩ්‍රජන් බෝම්බය ලෝකයට බිහිකරන ලදී.
මෙම ආකෘතිය "Teller-Ulam Configuration" (ටෙලර්-උලාම් වින්‍යාසය) ලෙස හඳුන්වන අතර වර්තමානයේ පවා  න්‍යශ්ටික අවි භාවිතා කරන්නේ මෙම ආකෘතියයි.

ඒ අනුව 1952 නොවැම්බර් 01 දින ලොව ප්‍රතම හයිඩ්‍රජන් බෝම්බ අත්හදා බැලීම සිදුකල අතර "මයික්"(Mike) නම් වූ එම බෝම්බයෙන් නිකුත් වූ ශක්තිය TNT මිලියන 10ක් පමන එකවර පුපුරායාමේදී නිකුත් වන ශක්තියට සමාන වූ බව පවසයි.එමෙන්ම පිපිරුමෙන් හට ගන්නා බිම්මලක හැඩය ගන්නා වළාව(Mushroom Cloud) තත්පර 90ක් ඇතුලත අඩි 57,000ක් තරම් උසකට ව්‍යාප්ත වී අඩි 120,000ක් තරම් උපරිම උසක් ලඟාකරගත් බවත් පැවසෙයි.එමෙන්ම එය සැතපුම් 60ක වපසරියක් පුරා ව්‍යාප්ත වුනු බවත් පැවසෙයි.
1954 යන වසරේදී තවත්  සාර්තක අත්හදා බැලීමකින් පසු ප්‍රතම වරට ගුවන් මගින් සිදුකරන හයිඩ්‍රජන් බෝම්බ ප්‍රහාරයක් අත්හදා බැලීමක් 1956 වස‍රේදී සුදු කර ඇත.
එම හයිඩ්‍රජන් බෝම්බය 1956 මැයි 20දින එරට වෙලාවෙන් අළුයම 5.51ට දකුණු පැසිෆික් සාගරයේ Marshal Islands හි Bikini Atoll නම් ප්‍රදේශයට ඉහල අඩි 10,000ක් ඉහල අහසේ සිට B52 වර්ගයේ ජෙට් යානකින් නිකුත් කරන ලදී.එහිදී නිකුත් වූ ශක්තිය TNT ටොන් මිලියන 15ක් එකවර පුපුරායාමේදී නිකුත්වන ශක්තියට සමාන බවට ගණන් බලා ඇති අතර පිපිරීමෙන් ඇතිවූ ගිනිජාලාවෙන් හටගත් දීප්තිය සූර්යන් 500ක දීප්තියට සමාන බව කියැවේ.

මෙම ප්‍රබලා විනාකාරී අවිය නිපඳවීමත් සමග ඇමරිකානුවන් ලැබූ ජයග්‍රහනය නැවත වරක් තමන් සතු කරගැනීමට සෝවියට් දේශය සමත් වූයේ ඇමරිකානු න්‍යශ්ටික ව්‍යාපෘතියේ සේවයේ යෙදී සිටියදී හසුවූ සෝවියට් ඔත්තුකරු වූ Klaus Fuchs විසින් එවන ලද ආචාර්ය ටෙලර්ගේ පරීක්ෂණ වාර්තා මත  පදනම්ව රුසියාව විසින්ද හයිඩ්‍රජන් බෝම්බ සෑදීමෙන් පසුවයි.
ඒ අනුව 1961 වසරේදී රුසියානුවන් විසින් අත්හදා බැලූ "Tsar Bomba" නම් හයිඩ්‍රජන් බෝම්බය එතෙක් මෙතෙක් ලෝක ඉතිහාසයේ පිපිරවූ ප්‍රබලතම හයිඩ්‍රජන් බෝම්බය වන අතර එය TNT ටොන් මිලියන 50ක් එකවර පුපුරා යාමකට සමානය.

--- සංකල්ප ගුණතිලක ✍️
     

අපරාධ විද්‍යාව සහ DNA තාක්ෂණය

අපරාධ විද්‍යාව සඳහා DNA තාක්ෂණය යොදාගත් ආන්දෝලනාත්මක ලොව මුල්ම සිදුවීම...........🌐🕵️

(මානව වංශකතාවේ තවත් එක හැරවුම් ලක්ෂයක් ගැන කතාවක්)

ලෝක ඉතිහාසයේ පෙරළියක් ඇතිකරමින්  ඉලෙක්ට්‍රොනික විද්‍යාවේදී සිදුවූ ට්‍රාන්සිස්ටරය සොයාගැනීමට සමාන සිදුවීමක් ජීව විද්‍යාවේදී සිදුවූවානම් ඒ DNA අනුවේ ව්‍යුහය සොයා ගැනීමයි. 1953 ජේම්ස් වොට්සන් සහ ෆ්‍රැන්සිස් ක්‍රීක් විසින් කේම්බ්‍රිජ් විශ්වවිද්‍යාලයේ කැවෙන්ඩිශ් විද්‍යාගාරයේදී මුල්වරට DNA අණුවේ ද්විත්ව හෙලික්සීය ව්‍යූහය නිරීක්ෂණය කළ අතර ඒ සඳහා ඔවුන් හට නොබෙල් ත්‍යාගය 1962 දී හිමිවුනා.ඒත් මෙ කතාව ඒ ගැන නෙමේ..

අපි හැමෝම දන්න දෙයක් තමා වර්තමානයේ අපරාධ විසඳීමේ කටයුතු සඳහා DNA යොදාගන්නා බව..ඉතින් වර්තමාන වන විට අපරාධ විසඳීම සඳහා මෙන්න මේ කියන DNA fingerprint technology හෙවත් DNA ඇඟිලිසලකුණු තාක්ෂණය යොදාගෙන අවුරුදු 30 ක් වෙනවා.මුලින්ම මේ ක්‍රමය භාවිතා කරන්නේ එංගලන්තයේ.මේ කතාව අන්න ඒ ගැනයි.

1983 වසර එංගලන්තයේ ලයිසස්ශයර් නගරය අවට ප්‍රදේශ තරමක් භීතියෙන් ඇළලී ගිය වසරක්.ඒ ඒ අවට ගමක සිදුවූ ඝාතනයක් නිසා.ඝාතනයට ලක්වුනේ ලින්ඩා මාන් නම් අවුරුදු 15ක් වසය දැරියක්.ඇය පාසල අවසන්වී නිවසට පැමිණෙන අතරමගදී මෙම අවාසනාවන්ත ඉරණමට ගොදුරු වී තිබුනා.නමුත් අවසනාවට පොලීසියට වරදකරු සොයාගත නොහැකි වුනත් අපරාද ස්ථානයේ තිබී ශුක්‍රාණු සාම්පලයක් ලබාගැනීමට පොලීසිය සමත්වුනා.

එම සිදුවීමෙන් වසර දෙක හමාරකට පසුව එම ගමේදීම ඩොව්න් ඈශ්වෝර්ත් නම් වයස අවුරුදු 15ක දැරියක් හවස 4:30ට පමණ සිය මිතුරියකගේ නිවසින් බැහැරව සිය නිවෙස බලා යාමට පිටත් වුනත් ඇය නැවත නිවෙසට පැමිණෙන්නේ නැහැ.අතුරුදන් වූ දැරිය සොයා සිදුකල විමර්ශන වලදී දූෂණයට ලක්ව මියගොස් සිටි ඇයගේ සිරුර ඉන් පෙර මෙයාකාරයට ඝාතනය වූ ලින්ඩා මාන්ගේ සිරුර තිබූ තැනට මීටර් කීපයක් එපිට තැනකදී හමුවන්නේ අදාල සිදුවීම් දෙකම දාම ඝාතකයෙකුගේ ක්‍රියාවක් බවට අඟවමින්.මෙම ඝාතන දෙකේම සමානකම් තිබූ අතර මෙහිදීද ශුක්‍රාණු සාම්පලයක් සොයාගැනීමට පොලිසීයට හැකියාව ලැබුනා.
විමර්ශන කටයුතු වලදී සැකපිට සැකකරුවන් කීපදෙනෙක්ම් අත්අඩංගුවට ගත්තද අපරාධකරු තවමත් අවිනිශ්චිතව පැවතුනා.කෙසේවෙතත් ඔවුන් අතරින් වැඩි අවධානයක් යොමු වූයේ ඝාතනයට ලක්වූ ඩෝව්න් ඈශ්වෝර්ත්ගේ මිතුරෙකු වූ 17 හැවිරිදි රිචඩ් බක්ලන්ඩ් නම් තරුණයාටයි.දැඩි ප්‍රශ්ණ කිරීම් වලදී මොහු තමන් විසින් අදාල දෙවන මිනීමැරුම සිදු කල බවත් පළමු සිදුවීමට තමා නිර්දෝශී බවත් ප්‍රකාශ කර සිටියා.නමුත් සිදුවීම් දෙකේ තිබූ සමාන කම නිසා මෙම සිදුවීම් දෙකම එකම අයෙකු විසින් සිදු කරන්නට ඇති බව පොලිසිය විශ්වාස කල අතර රිචඩ් බක්ලන්ඩ්ගේ පාපොච්චාරණයට අනුව ඔහු පළමු මිනීමැරුමට වරදකරු ලෙස සැලකුවොත් ඒ වන විට ඔහු වයස අවුරුදු 14 ක ළමයෙක් වීම නිසා පොලීසිය ඔහුගේ මෙම ප්‍රකාශය පිළිගැනීමට දැක්වූයේ මැලිකමක්....

ඉහත සිදුවීම් ජාලාව එසේ සිදිවෙමින් පවතිද්දී මෙම ගම්මානයට සැතපුම් පහක් වයඹ දෙසිනි පිහිටා තිබූ ලෙයිසෙස්ටර් විශ්වවිද්‍යාලයේ සේවය කල තරුණ විද්‍යඥයෙකු වූ ඇලෙක් ජෙෆ්‍රිස් විසින්  ඉතා සුවිශේෂී සොයාගැනීමක් සිදුකර තිබුනා.ඒ පළමු ඝාතනය සිදුවී වසරකට පසුව එනම් 1984 වසරේදීයි. ඇත්තෙන්ම ඒ ඉතා අහම්බෙන් නැතිනම් අත්වැරැදීමකින් සොයාගත් සොයාගැනීමක්.ඇලෙක් ජොෆ්‍රිස් අධ්‍යනය කරමින් සිටියේ ප්‍රවේණිගත රෝගවල පාරම්පරික ගලායෑම පිළිබඳවයි.නමුත් ඔහු විසින් ලබාගත් සෛලවල ඇති DNA අණු සතු පුනරාවර්තී ඒකක එකිනෙකින් වෙනස් බවත් ඒ අනුව එය අයිති තැනැත්තා ඉතා ඉහළ නිරවද්‍යතාවකින් යුතුව හඳුනාගත හැකිබවත් ඔහු විසින් නිරීක්ෂණය කර තිබුනා.
ඒ ආකාරයෙන් තමයි DNA ඇඟිලිසලකුණු තාක්ෂණය මගින් පුද්ගලයන් හඳුනා ගැනීමේ ක්‍රමය ඔහු විසින් සොයාගත්තේ.ඉන් පසුව බ්‍රිතාන්‍යයන්ට දාව ඉපදුනු දරුවන් යැයි පවසමින් කුඩා ළමුන් පෙන්වමින් බ්‍රිතාන්‍යයට ඇතුලු වීමට උත්සහ දැරූ අය විසින් එලෙස ඉදිරිපත් කල දරුවන්ගේ අනන්‍යතාව විමසීමට ඇලෙක් විසින් තම සොයගැනීම යොදාගත්තද ඒ වන විටත් අධිකරණ වෛද්‍ය විද්‍යාවට මෙම ක්‍රමය පැමිණ තිබුනේ නැහැ.
නමුත් ඒ ලයිසස්ශයර් ද්විත්ව ඝාතනයේ පටලැවිල්ල ලිහාගැනීමට මෙම ක්‍රමය යොදාගත හැකිදැයි විමසමින් ඇලෙක් ජොෆ්‍රිස් වෙත පොලිසියෙන් අනපේක්ෂිත දුරකතන ඇමතුමක් ලැබෙන තෙක් පමණයි....

ඇලෙක් විසින් සිය ක්‍රියාදාමය එලෙස ඇරඹීය.
සැකකාර බක්ලන්ඩ්ගේ රුධිර සාම්පල වල හා ඝාතනයන් වූ ස්තාන වලින් ලබාගත් ශුක්‍රාණු වල DNA සැසඳීම ඇරඹිනි.පුරා රාත්‍රියක නිදිවර්ජිත තීරණත්මක පරීක්ෂණයෙන් පසුව ලබාගත් දත්ත වලට අනුව මිනීමරුවා සෙවීම තිබුනාටත් වඩා දුශ්කර තැනකට වැටුනු බව පෙනෙන්නට විය.එනම් ශුක්‍රාණු එකම තැනැත්තාට අයත් බවත් එනම් ඝාතකයා එකම අයෙක් බවත් බක්ලන්ඩ්ගේ DNA ඒ හා කිසිසේත්ම නොගැලපෙන බවත්ය.එනම් ඝාතකයා බක්ලන්ඩ් නොවන වෙනත් අයෙක් බවය.පරීක්ෂණය නැවත නැවටත් සිදුකෙරිනි.තෙවන වතාවටත් සිදුකෙරිනි.එහෙත් ප්‍රතිපලය එයම විය.ඒ අනුව බක්ලන්ඩ් වරදකරු නොවන බැවින් ඔහුව නිදොස් කරන ලදී.

ද්විත්ව ඝාතකයා සෙවීම අලුතෙන් නැවත ඇරඹිනි.මීලඟ සැලැස්ම වූයේ අදාල ප්‍රදේශයේ සෑම පිරියෙකුගෙන්ම DNA සාම්පල එකතු කිරීමයි.ඒ අනුව 1953 ත් 1970ත් අතර ඉපදුනු අදාල ප්‍රදේශයේ ජීවත්වූ හෝ එහි සේවයේ නිරත වූ සෑම පිරිමි අයෙකු වෙතම රුධිර සාම්පල ලබාදෙන මෙන් ලියුම් යවනු ලැබීය.
රුධිර සාම්පල එකතු කිරීමේ මධ්‍යස්ථාන දෙකක් පිහිටවන ලදී.සතියකට දින තුනක් උදෑසන හා සන්ද්‍යාභාගයේ වශයෙන් රුධිර සාම්පල එකතු කිරීම ඇරඹිනි.මෙය ස්වේච්ඡා ක්‍රියාදාමයක් වූ නමුත් චූදිතයෙකු වීමේ භිය නිසාම සියල්ලන්ම පාහේ රුධිර පරිත්‍යාගයට දායක විය.ඒ අනුව මිනිසුන් 1000කගෙන් රුධිර සාම්පල එකතු කරන්න පොලීසියට හැකියාව ලැබුනා..
අලුත් විද්‍යාත්මක ක්‍රමයක් යොදාගෙන මිනීමරුවෙක් අල්ලන්න දියත් කරන මේ දැවැන්ත මෙහෙයුම ගැන කතාව රටපුරාම පැතිර ගියා..ඉන් එහාට මුලු ලෝකෙ පුරාමත්..New York times වගේ ජාත්‍යන්තර පුවත්පත් වල පවා මේ මෙහෙයුම ප්‍රධාන සිරස්තල හිමිකරගත්තා..තව තවත් රුධිර සාම්පල එකතුවුනා..අවසානයේ මිනිසුන් 5,511 කගෙන් රුධිර සාම්පල..
ඒත් පොලීසිය නැවටත් අසාර්තකයි..
ආයෙත් ශුක්‍රාණු හා ගැලපෙන එකඳු සාම්පලයක්වත් නෑ..ඒ 5,511 ඇතුලෙත් නෑ..එහෙනම් මිනී මරුවා කවුද..විමර්ශන තව තවත් අසීරු තත්වෙට වැටුනා..
ඒත් එක පුංචි සිදුවීමකින් මේ පඹගාල ලිහාගැනීමට පොටක් පෑදුනා..ඒ ඩෝව්න් ඈශ්වෝර්ත් ඝාතනය වී  වසරකටත් අධික කාලයක් ගෙවීගිය පසුවයි.
මාලුවත් කට හින්දා නහින්නා වගේම මේකට හේතුවෙනෙත් එක්තරා කටක්ම තමයි..ඒ තැබෑරුමක බීමතින් දොඩන්නෙකුගේ කටක්..

1987 අගොස්තුවේදී තැබැරුමක බීමතින් සිටි "කෙලී" (Kelly) නම් තරුණයෙක් ප්‍රකාශ කරසිටියේ තමන් විසින් තමන්ගේ මිතුරෙකු වූ "කොලින් පිච්ෆෝර්ක්"(Colin Pitchfork) නම් තැනැත්තා වෙනුවෙන් ව්‍යාජ හැඳුනුම්පතක් භාවිතා කර රුධිරය ලබා දුන් බවයි.මෙම සවාදයෙන් සති හයකට පසුව මෙම තැබෑරුනේ සිටි අයෙක් මේ පිළිබඳව පොලීසියට දැනුම්දුන් අතර වහා ක්‍රියාත්මක වන පරිදි කෙලී නම තැනැත්ත හා කොලින් පිච්ෆෝර්ක් අත්අඩංගුවට ගන්නා ලදී.රුධිර පරීක්ෂණය නැවත සිදු කෙරිනි.එහිදී ඉහත ශුක්‍රාණු සාම්පල හා කොලින්ගේ DNA මනාව ගැලපිනි.ඒ අනුව ඔහු වරදකරු බවට අවිවාදයෙන්ම පත්විය.
ඉන් පසුව එළඹි ජනවාරියේ කොලින් පිච්ෆෝර්ක් උසාවියෙන් වරදකරු වී ජීවිතාන්තය දක්වා සිරදඬුවම් ලැබීය.
ඒ ඉහල මිනීමැරුම් දෙකට අමතරව වෙනත් ස්ත්‍රී දූෂණ දෙකකටද වැරදිකරු ලෙසින්.

පොලිස් අත්අඩංගුවේ සිටින කාලයේදී " ඈශ්වෝර්ත් හටම එවැන්නක් කලේ ඇයිදැයි" කොලින් පිච්ෆෝර්ක්ගෙන් අසන ලද පසුව ඔහුගේ පිළිතුර වුයේ ,
" අවස්‍තාව...ඇයත් එතැන සිටියා.මමත් එතැන සිටියා" යන්නයි.

ඉතින් නියම වරදකරු සොයාගෙන දඬුවම් ලැබීමට ගිය නිවැරදිකරුවෙකු බේරාගනිමින් DNA තාක්ෂණය අධිකරණ වෛද්‍ය විද්‍යාව තුල ලෝක ඉතිහාසයේ පළමු වරට භාවිතයට ගැනුනේ එලෙසින්.
එතැන් පටන් වසර 30 පුරාවට අද දක්වා මිලියන 50ක පමණ පිරිසකගේ DNA අපරාධ විමර්ශන කටයුතු සඳහා භාවිතා කර තිබෙනවා වගේම සිය නිර්දෝශී භාවය ඔප්පු කරගත නොහැකිව නිකරුනේ දඬුවම් විඳීමට ගිය මිලියනයක් පමණ පිරිසක් නිදොස් කොට නිදහස් කිරීමටත් ඇලෙක් ජොෆ්‍රිස්ගේ මෙම අද්විතීය සොයාගැනීමට හැකියාව ලැබුනා..
මෙම සොයාගැනීම තුලින් ලෝකයට සිදුකල සේවය උදෙසා ඇලෙක් ජොෆ්‍රිස් 1994දී නයිට් පදවියකින් පිදුම් ලැබුවා..

කතාවේ ලස්සනම කෑල්ල කියන්නද..
අපරාධ විසඳීමට තමා විසින් සොයාගත්  DNA තාක්ෂණය භාවිතා කල හැකිබව මුලින්ම ඇලෙක් ජොෆ්‍රිස් කියද්දි ඒක අහපු හැමෝම එයාට හිනාවුනා..ඒත් අද..??
බලන්න අනෙක් අයගේ සමච්චලය මැද්දෙ වුනත් ඇලෙක් ජොෆ්‍රිස්ට තමන් ගැන තිබුන විශ්වාසය..අන්න ඒ විශ්වාසයට ස්තූතිවන්ත වෙන්න අද ලෝකයා කොච්චර දුරක් ආවද..?
බක්ලන්ඩ් ඇතුලු අර මිලියනයම ඔහුට ණයගැති නොවේද...

ප.ලි.:- රූපයේ සිටින්නේ කතාවේ මැජික්කාරයා..."ශ්‍රීමත් ඇලෙක් ජෝන් ජොෆ්‍රිස්"

 --- සංකල්ප ගුණතිලක✍️
   

ප්‍රතික්ෂේප කිරීම තුලින් පරාර්තකාමීත්වය කියා දුන් ගෝඩ්ෆාදර්

1973 වසර ඔස්කා සම්මාන ඉතිහාසයට සුවිශේෂී මතක සටහනක් එකතු කල වසරක්.
ඒ එම වසරේ මාර්තු 5 වෙනි අඟහරුවාදා පැවැත්වූ 45 වෙනි ඇකඩමි සම්මාන රාත්‍රියේ සිදුවූ අපූරු සිදුවීමක් නිසයි.

ඇමරිකාවේ නිව් යෝර්ක් නගරය කේන්ද්‍ර කරගනිමින් ක්‍රියාත්මක වන මාෆියා පවුලක් වටා ගෙතුනු කතා තේමාවක් රැගත් මාරියෝ පූසෝගේ ගෝඩ්ෆාදර් නවකතාව ඇසුරෙන් ෆ්‍රැන්සිස් ෆෝඩ් කොපෝලාගේ(Francis Ford Coppola) අධ්‍යක්ෂනයෙන් 1972 වසරේදී නිර්මාණය වුනු ගෝඩ්ෆාදර් චිත්‍රපටය ඇකඩමි සම්මාන 3ක් ගෝල්ඩන් ග්ලෝබ් සම්මාන 5ක් ඇතුලු සම්මාන වැස්සකින් පිදුම් ලද එමෙන්ම අදටත් ලොව බිහිවූ විශිෂ්ටතම සිනමා කෘතියක් ලෙස සැලකෙනවා.

එහි ප්‍රධාන චරිතය වූ මාෆියා නායක දොන් විටෝ කොලියෝන්ගේ චරිතය සඳහා දැක්වූ අද්විතීය රංගන කුසලතාව වෙනුවෙන් 1973 වසරේ පැවති 45 වන ඇකඩමි සම්මාන රාත්‍රියේ වසරේ විශිෂ්ටතම නළුවාට හිමි සම්මානය මාලන් බ්‍රැන්ඩෝ(Marlon Brando) හට හිමිව තිබුනා.

  නමුත් එදින නිවේදක රොජර් මෝ විසින් මාලන් බ්‍රැන්ඩෝ ලෙස ජයග්‍රාහී නාමය ප්‍රකාශ කිරීමත් සමග ශාලාව පුරා පැතිරී ගිය අත්පොලසන් හා ඔල්වරසන් හඬ මධ්‍යයෙන් මාලන් බ්‍රැන්ඩෝ නම් නැගිට සිටියෙ නැහැ.ඒ වෙනුවට සාම්ප්‍රදායික රතු ඉන්දියානු ඇඳුමකින් සැරසුණු තරුණියක් රැස්ව සිටි පිරිස අතරින් නැගී සිටියා.ඇය මාලන් බ්‍රැන්ඩෝ නියෝජනය කරමින් සම්මාන රාත්‍රිය සඳහා සහභාගී වූ සාශීන් ලිට්ල්ෆෙදර්(Sacheen Littlefeather) නම් රතු ඉන්දියානු සම්භවයක් ඇති අප්‍රකට නිළියක් මෙන්ම ස්වදේශිකයින්ගේ අයිතිවාසිකම් පිළිබඳ ක්‍රියාකාරිනියක්.
 
 වේදිකාවට ගොඩවෙත්ම සම්මානය ඇයට ප්‍රධානය කලත් හස්ත මුද්‍රාවෙන් එය ප්‍රතික්ෂේප කල ඇය සම්මානය නොගෙනම මයික්‍රොෆෝනය අසලට ගමන් කරන්නේ මාලන් බ්‍රැන්ඩෝ විසින් සටහන් කරල ලද පණිවිඩයක් සහිත ලිපියක්ද සමගයි.,

 "වසර දෙසීයක් පුරාවට අප විසින් ස්වදේශී 
  ඉන්දියානුවන් රවටමින් සිටිනවා..
  ඔවුන්ව මරා දමනවා..
  ඔවුන්ගේ ඉඩම් බලෙන් අත්පත් 
  කරගන්නවා..
  නිදහසේ ජීවත් වීමේ අයිතිය ඔවුන්ගෙන්
  උදුරා ගන්නවා..
  අපගේ සිනමාව තුල පවා ඉන්දියානුවන් 
  සරදමට ලක් කරමින්, ඔවුන්ව යක්ෂයන්
  ලෙස හංවඩු ගසනවා..
  එවැනි සිනමාපට හා රූපවාහිනී වැඩසටන් 
  නරඹන ඉන්දියානු දරුවන්
  තමන්ගේ ජාතියට උරුම වන
  මෙම පහත් සැලකීම දකින විට මේ
  ලෝකයේ ඔවුන්ගේ අනන්‍යතාව ගොඩනගා
  ගන්නේ කෙසේද..
  එහිදී අපට කිසිමදාක සිතාගැනීමටවත් 
  නොහැකි පරිදි
  ඔවුන්ගේ සිතුවිකි බිඳ වැටෙනවා...
  ඉතින් මහත්වරුනි...,
  එවැනි පසුබිමක එවැනි සිනමාවකින් ඔබලා
  විසින් පිරිනමන මේ ගෞරවාන්විත 
  සම්මානය
  මා හට භාරගත නොහැකියි...
  ස්තූතියි. "
 

    සිය ලිපියේ එසේ සනිටුහන් කරමින් රතුඉන්දියානු ස්වදේශීය ජනයාගේ අ‍යිතිවාසිකම් උදෙසා රංගන ශිල්පියෙකුට සිය ජීවිත කාලයේ ලැබිය හැකි ඉහලම සම්මානය වන ඔස්කා සම්මානය මාලන් බ්‍රැන්ඩෝ නම් අද්විතීය රංගධරයා විසින් කැප කරන්නේ සුවහසක් ලෝකවාසීන්ගේ අවධානය රතු ඉන්දියානු ජනයාගේ ජීවන ගැටලු වෙත යොමුකරමිනුයි.

  සාශීන් ලිට්ල්ෆෙදර් විසින් ඉතා කෙටියෙන් ඉදිරිපත් කල මෙම සුවිශේෂී ලිපියේ සම්පූර්ණ පිටපතක් ඊට පසුදිනම "The New York Times" සඟරාවේ "The Unfinished Oscar Speech" ලෙස පලවෙන්නේ බ්‍රැන්ඩෝ විසින් කරන ලද දීර්ඝ විස්තරය සහිතවයි.
එමෙන්ම මාලන් බ්‍රැන්ඩෝගේ ලිපිය විසින් එම වසරේම සිදුවූ ස්වදේශික ඉන්දියානුවන් හා ඇමරිකානු නිළධාරීන් අතර Wounded Kneeහිදී  ඇතිවූ ගැටම්කාරී වාතාවරණය දෙසට ලෝක අවධානය ලබා දීම මෙන්ම රතු ඉන්දියානුවන්ගේ අයිතිවාසිකම් පිළිබඳ කතාබහක් ඇති කිරීමත් සිදු කරන ලද්දේ බ්‍රැන්ඩෝගේ කැපකිරීමට සාධාරණයක් ඉටු වෙමිනි.

ඉතින් ජීවිතයේ ලැබෙන වටිනාම සම්මානය අසාධාරණත්වයෙන් පීඩා විඳින අහිංසක ස්වදේශික ජනයාගේ අයිතිවාසිකම් වෙනුවෙන් කැප කරමින් සුපිරි නළු මාලන් බ්‍රැන්ඩෝ විසින් ප්‍රතික්ෂේප කිරීමේ හා පරාර්තකාමීත්වයේ පාඩම ලෝකෙට කියා දුන් වගයි.

---- සංකල්ප ගුණතිලක✍️
       

ඉතිහාසය වෙනස් කරපු සිද්දියක්

පුංචි දෙයකින් පුළුවන්ද ලෝකයේ ගමන්මග උඩුයටිකුරු කරන්න...??🙄😶

මේක ලෝක ඉතිහාසය වෙනස් කරපු සිද්ධියක්..හරියටම කිව්වොත් ලෝකයේ ගමන් මග සම්පූර්ණයෙන්ම වෙනස් කරපු නොසැලකිය හැකි තරම් පුංචිම පුංචි සිද්දියක්..සැඟවිලා තිබ්බ මේ කතාව කියන්නේ Max Tremwell කියන පූජක තුමා විසින් එතුමා මරණාසන්නව ඉන්න වෙලාවෙදී.ඒ 1980 දී.
කතාව මෙහෙමයි....

ස්විට්සර්ලන්තය,ඔස්ට්‍රියාව සහ ජර්මනිය හරහා ගලා යන "Inn" කියල ගඟක් තියෙනවා..ඔය ගඟ ජර්මනියේ Passau (පැසාවු) කියන නගරය හරහාත් ගලායනවා.Passau කියන්නේ ජර්මන් - ඔස්ට්‍රියා දේශසීමාව ලඟ තියෙන පොඩි නගරයක්...
1894 සීතල දවසක passau නගරයේ මේ ගංඟා ඉවුරේ සෙල්ලම් කර කර හිටපු අවුරුදු 4ක් වයස එක්‍තරා පිරිමි දරුවෙක් මේ ගඟට වැටෙනවා..Inn ගඟේ සීතල වතුරේ ගිලෙද්දී නොගිලී ඉන්න දඟලන මේ දරුවගේ වාසනාවට නමුත් බොහෝවිට ලෝකයේ අවසානාවට එතනින් යනවා අර කලින් කිව්ව Max Tremwell කියන පූජක තුමයි ඔහුගේ මිත්‍රයා වුන Johann Kuehberger කියල කෙනයි...මේ දෙන්නත් ඒ කාලේ පොඩි ළමයි..පස්සෙ කාලෙක දෙන්නම පූජකයෝ දෙන්නෙක් වෙනවා..ඉතින් මේ ගිලෙන්න යන දරුවව දැකපු Johann Kuehberger කියන කෙනා ඉක්මනින් ගඟට පැනලා ගඟේ සීතල සැඩ පහර එක්ක සටන් කරලා අර ගිලෙන්න ගිය පිරිමි දරුවව බේර ගන්නවා..
ඒ කතාව එච්චරයි..
හරිම පොඩි සිද්දියක්..කොහොමද එහෙනම් මේක ලෝක ඉතිහාසය වෙනස් පාරකට හැරෙව්වේ..
ඒක වෙන්නේ මෙහෙමයි....
අර ගඟට වැටිලා ගිලෙන්න ගිය අවුරුදු හතරේ පිරිමි දරුව ඉන්නවා නේද ,අන්න එයා නිසා පසුකාලීනව ජීවිත මිලියන 11ක් විනාශ වුනා කිව්වොත් පිළිගන්න පුළුවන්ද..පුළුවන් වුනත් බැරිවුනත් ඒක පිළිගන්න වෙනවා..මොකද එදා ඒ ගිලෙන්න ගිහින් තමන්ගේ වාසනාවට එහෙත් ලෝකයාගේ අවාසනාවට බේරුන ළමය තමයි පස්සෙ කාලෙක ජර්මානු ආඥාදායක මෙන්ම දෙවන ලෝක සග්‍රාමයේ ආරභකයා වෙලා යුදෙව්වන් මිලියන ගානක ඝාතකය වෙන්නේ.. ඒ  කියන්නේ ඒ පොඩි දරුව වෙන කවුරුත් නෙමෙයි එයා තමයි "ඇඩොල්ෆ් හිට්ලර්"...
සමහර විට එදා Johann Kuehberger එතන නොහිටියානම් අර දරුවා දියේ ගිලිල මිය ගියානම් ලෝක ඉතිහාසයේ අඳුරුතම පරිච්ඡේදය කිසිදා උදා නොවන්නටත් තිබුනා..දෙවන ලෝක යුද්දය ආරම්භ නොවන්න තිබ්බා..මිලියන 11ක යුදෙව් ජීවිත විනාශ නොවෙන්න තිබ්බා..

පහල රූපයේ දකුණු පැත්තෙන් ඉන්නේ ඒ ගිලෙන්න ගිය දරුවා..වමේ ඉන්නේ එයාව බේරගත්ත කෙනා.

--සංකල්ප ගුණතිලක✍️
   

විසිවන සියවසේ ආදරය උදෙසා කල ශ්‍රේෂ්ටතම පරිත්‍යාගය❤

සාලිය කුමාරයා කියන්නේ මුළු ලංකා දීපයටම අගරජ වෙන්න හිටපු කෙනෙක්.එයා තමයි ලංකා ඉතිහාසයේ හිටිපු බලවත්ම පාලකයාගේ පුතා.ඒත් අශෝකමාලා කියන සැඩොල් කුලේ ස්ත්‍රිය විවාහ කරගන්න එයා රජකම අතාරිනවා..

  මේ කතාවේ ප්‍රේමවන්තයා වෙන්නෙත් රජ පවුලක කෙනෙක්.හරියටම කිව්වොත් එයා බ්‍රිතාන්‍යය රජ කිරුළ දරපු රජ කෙනෙක්.ඒ තමයි අට වෙනි එඩ්වර්ඩ් රජතුමා.
8 වෙනි එඩ්වඩ් එහෙම නැත්නම් "එඩ්වර්ඩ් ඇල්බට් ක්‍රිස්ටියන් ජෝර්ජ් ඇන්ඩෘ පැට්‍රික් ඩේවිඩ්" කුමරු උපත ලබන්නේ වික්ටෝරියා රැජිණ රජකම් කරන කාලයේදීයි.ඒ 1894 ජූනි මස 23 දින සරේ ප්‍රාන්තයේ රිච්මන්ඩ් පාක් හි White Lodge මන්දිරයේදී එවකට යෝර්ක් හි ආධිපාදවරයාව සිටි එමෙන්ම පසු කලෙක බ්‍රිතාන්‍යයේ රජ වූ පස්වන ජෝර්ජ් රජුට හා ඔහුගේ බිරිඳ වූ මේරි රැජිණට දාව  සහොදරයන් හයදෙනෙකු සහ එක් සහෝදරියකගෙන් යුත් පවුලේ වැඩිමලා විදියටයි.
උපදින විට රජකිරුළට තෙවන උරුමක්කාරයා වුනේ එඩ්වඩ් කුමරුයි.ඒ ඔහුගේ සීයාට සහ පියාණන්ට පසුවයි.හත්වන එඩ්වඩ් ලෙස සිය පියාණන්ගේ පියා රජවූ අතර එයින් පසු රජකම ඔහුගේ පියාට හිමිවිය.1910 මැයි මස 06 වන දින එඩ්වඩ් කුමරුගේ පියා "5 වන ජෝර්ජ්" ලෙස බ්‍රිතාන්‍යය අධිරාජ්‍යයේ රාජ්‍යත්වයට පත්වන විට ,එඩ්වඩ් කුමරු නිරායාසයෙන්ම රජපවුලේ වැඩිමලා විසින් දැරිය යුතු "Cornwall හි ආදිපාද" තනතුරටත් , රජ කිරුළේ උරුමකරු විසින් හෙබවිය යුතු "Rothesay හි ආදිපාද" තනතුරත් පත්විය.එමෙන්ම 1910 ජූනි 23 දින එනම් ඔහුගේ 16 වන උපන්දිනය දා  වේල්සයේ කුමරු ලෙසත් චෙස්ටර් හි අර්ල්වරයා ලෙසත් ඔහුව නම් කෙරිනි.
1907 දී "රාජකීය නාවික විද්‍යාලයට" ඇතුලත් වූ ඔහු නාවික කැඩෙට් වරයෙක් ලෙස පළමු ලෝක යුද්ධයේදී බ්‍රිතාන්‍ය නාවික හමුදාවේ සේවය කලේය.ඉන්පසු 1911 දී නාවික විද්‍යාලයෙන් ඉවත් වූ ඔහු ඔක්ස්ෆර්ඩ් විශ්වවිද්‍යාලයට අනුබද්ධ Magdalen විද්‍යාලයට ඇතුලත් විය.

එඩ්වඩ් කුමරු හට විවාහක කාන්තාවන් සමග ප්‍රේම සම්බන්ධතා කීපයක්ම තිබිනි."තෙල්මා මෝර්ගන්" යනු එයින් එක් අයෙකි.1931 ජනවාරි 10 දින තෙල්මා මෝර්ගන් විසින් සාදයක් සංවිධානය කර තිබුනි.එයට එඩ්වඩ් කුමරුටද ආරාධනා ලැබුනු අතර කුමරුගේ ජීවිතේ වෙනස් කරන හමුවීම සිදුවන්නේ මෙම සාදයේදීයි.
    තෙල්මා මෝර්ගන් විසින් Wallis Simpson(වාලිස් සිම්සන්) නම් සිය ඇමරිකානු ජාතික මිතුරියකටද මෙම සාදය සඳහා ආරාධනා කර තිබිනි.
Wallis Simpson උපන්නේ 1896 ජූනි 19 දා ඇමරිකාවේ Maryland හිදීයි.ඇය ඉපදී පස් මසක් ගත වූ පසු ඇගේ පියා මෙලොව ඇතැර ගියේ කිසිඳු වත්කමක් සිය බිරිඳට හා දියණියට ඉතිරි නොකරමිනි.එම නිසා ඔහුගේ මරණින් පසු අන්ත දුගී තත්වයට පත්වූ ඔවුන්ව රැකබලා ගත්තේ වාලිස්ගේ මියගිය පියාගේ සහෝදරයා විසිනි.
 තරුණ වසයට අවතිර්ණ වුනත් වාලිස් එතරම්ම රූමත් ස්ත්‍රියක් නොවීය.නමුත් ඇයට  දීප්තිමත් නෙත් යුගලක් සහ ආකර්ශනීය කෙස් කළඹක් තිබිනි.නීල වර්ණ නෙත් යුගලක් හිමි ඉතා කඩවසම් අයෙක් වූ බ්‍රිතාන්‍යයේ ඔටුන්න හිමි කුමරු ඇයට වශී වීමට එය හොඳටම ප්‍රමාණවත් විය.
එඩ්වඩ් කුමරු හමුවන විට වාලිස් දෙවතාවක් විවාහ වී සිටි කාන්තාවක් විය.ඇයගේ පළමු විවාහය සිදු වූයේ ඇමරිකානු නාවික හමුදාවේ නියමුවරයෙක් සමගයි.නමුත් පළමුවන ලෝක යුද්ධය අවසන් කර නැවත පැමිනි ඔහුට යුද්ධයෙන් ලද කම්පනය නිසා සිය සුපුරුදු පැරණි ජීවිතයට අවතීර්ණ වීමට නොහැකි වී බේබද්දෙකු බවට පත්විය.වාලිස් ගේ පළමු විවාහ දිවිය එසේ බිඳී ගොස් දෙදෙනා දික්කසාද වී මාස 6කට පසු එනම් 1928 ජූලි මාසයේදී ඇය සිය දෙවන විවාහය ව්‍යාපාරිකයෙකු වූ අර්නස්ට් සිම්පසන් සමග සිදු කර ලන්ඩනයේ පදිංචි විය.වාලිස් හට තෙල්මා මෝර්ගන්ගේ සාදය සඳහා ආරාධනා ලැබෙන්නෙත් එඩ්වඩ් කුමරු මුන ගැසෙන්නෙත් මේ අවධියේදීය.

මුලින්ම වාලිස් සිම්පසන් හා එඩ්වඩ් කුමරු අතර මුලින් ඇතිවූ මිත්‍රත්වය ක්‍රමයෙක් ආදරයක් දක්වා වර්ධනය වූයේ එඩ්වඩ් හා පියරජු අතරත් එඩ්වඩ් සහ තෙල්මා මෝගන් අතරත් වූ සම්බන්ධතා ටිකෙන් ටිකෙ පලුදු හා දුර්වල කරමිනි.ඒ වන විට වාලිස් සිම්සන් විසින් සිය දෙවන විවාහයෙන්ද දික්කසාද වීමේ මූලික පියවර තබා තිබූ සමයකයි.ඇය ඇමරිකානු ජාතික කාන්තාවක් වීමත් දෙවතාවක්ම විවාහ වී සිටීමත් මෙන්ම දෙවන විවාහයේ සැමියා තවමත් ජීවතුන් අතර සිටීමත් යන හේතු කරුණුකොට ගෙන ජෝර්ජ් රජු ඇතුලු රාජකීයනුත් රජයේ ඉහළ පෙලේ නිළධාරීනුත් එඩ්වර්ඩ්ගේ මෙම ප්‍රේම සම්බන්දය පිළිබඳ දැරුවේ දැඩි සෘණාත්මක මතයකි.ජෝර්ජ් රජු විසින් ඔවුන් දෙදෙනා පසුපස රහස් ඔත්තු සේවයේ නිළධාරීන් පවා යෙදවීය.නමුත් දෙදෙනා අතර බැඳීම ඒ කිසිවකට බිඳ හෙලිය නොහැකි විය.ඇතැම් ඉතිහාසඥයන්ට අනුව වාලිස් සැබෑවටම ආදරය කලේ එඩ්වඩ් හට නොව ඔහු සතු බලයට ධනයට හා කීර්තියට බව පැවසුනත් ඒවා රජපවුලේ ගෞරවය උදෙසා වාලිස් හටම වැරැද්ද පැටවීමේ අරමුණෙන් ගොතන ලද කතන්දර බව  සමහරු ප්‍රකාශ කරයි.

  කෙසේ වෙතත් 1936 ජනවාරි 20 මධ්‍යම රාත්‍රිය එළඹීමට ඔන්න මෙන්න තිබියදී සිය පිය රජු වූ පස්වන ජෝර්ජ් රජ මිය ගිය බව ඔටුන්න හිමි එඩ්වඩ් කුමරුට දැනගන්න ලැබිනි.ඒ අනුව පියාගේ ඇවෑමෙන් මහා බ්‍රිතාන්‍ය අධිරාජ්‍යයේ කිරුළ එඩ්වර්ඩ්ට හිමි විය.ඔහු 8 වන එඩ්වර්ඩ් ලෙස රාජ්‍යත්වයට පත් විය.
රාජ්‍යත්වයට පත්වූ විගසම ඔහු ලබාදුන් ඇතැම් තීන්දු තීරණ අනුව සිය පියා විසින් සිදුකරන ලද ඇතැම් ප්‍රතිසංස්කරණ  නොසලකා හරින බවත් සාම්ප්‍රදායික රාජ්‍ය පාලන ක්‍රමවේදයන් අභියෝගයට ලක්කරන බවත් පෙනෙන්නට තිබිනි.රාජ්‍ය පරිපාලනය නව්‍යකරණයකට ලක් කිරීමට එඩ්වඩ් රජුට අවශ්‍ය විය.ඔහු විසින් සිය වයෝවෘධ රාජකීය උපදේශකයන් සේවයෙන් ඉවත් කරන ලද්දේ ඔවුන් සතු උපදෙස් හා විසඳුම් යල්පැන ගිය ඒවා බව පවසමිනි.එමෙන්ම ඇතැම් රාජකීය නිළධාරීන්ගේ වැටුප් හා දීමනා කපා හරින ලදී.මේ හේතූන් නිසා ඔහු වටා සිටි ඇතැමුන් ඔහු පිළිබඳ කලකිරීමෙන් සිටි නමුත් ලෝක යුද්ධයට දායක වී යුද්ධ පිළිබඳ මනා අවබෝදයක් ලබා සිටි නිසත් අධිරාජ්‍යයේ සෑම අස්සක් මුල්ලක් කරාම සංචාරය කර අධිරාජ්‍යය පිළිබඳ මනා අවබෝදයක් ලබා සිටි නිසාත් ඔහු දේශපාලනික වශයෙන් සාර්තකවේයැයි විශ්වාසයක් රජයේ ඉහල පෙලේ නිළධාරීන් සතුව පැවතිනි.නමුත් ඊටද කනකොකා හඬන්නට පටන් ගත්තේ ඔහු සතුවූ වගකීම් විරහිත ක්‍රියා කලාපය නිසයි.විශේශ රැස්වීම් , හමුවීම් මෙන්ම කැබිනට් පත්‍රිකා අත්සන් තැබීම් පවා ඔහු විසින් වගකීම් විරහිත ලෙස නොසලකා හරින ලදී.අවසාන මොහොතේ පවා ඒවා ව්‍යාර්ත කරන ලදී.ඔහු එසේ රාජකාරි පැහැර හැර වගකීම් වූයේ වාලිස් සිම්සන් වෙත ඔහුගේ වූ දැඩි බැඳීම නිසා බව ඇතැමෙක්ගේ පිළිගැනීම විය.තවද ඉතා වටිනා අණපනත් පවා ජර්මානු ඔත්තුකරුවන් සතුවීමේ අවධානමක් මතුවූයේ මේ අවධියේයි.ඇතැමුන් මෙයටද වාලිස් සිම්සන් හට චෝදනා කරේ ඇය ජර්මන් ඔත්තුකරුවෙකු ලෙසට හංවඩු ගසමිනි.අර්බුදය තව දුරටත් ව්‍යාකූල වෙමින් වර්ධනය වෙමින් තිබිනි.
මෙවන් අවධියක රජුගේ පුද්ගලික ලේඛම් වූ ඇලෙක්සැන්ඩර් හ'ඩින්ජ් ( Alexander Hardinge) විසින් රහසිගත ලිපියක් එඩ්වඩ් රජ වෙත එවා තිබිනි.එහි වූයේ වර්ධනය වෙමින් පවතින ව්‍යාකූල තත්වය හමුවේ මාධ්‍ය හා මහජනයා වැඩිකලක් නිහඬව නොසිටින බවත් රජයට ඉල්ලා අස්වන ලෙස බලකරනු ඇති බවත්ය.එම තත්වයෙන් මිදීමට රජුලෙස එඩ්වඩ් හට විසඳුම් තුනක් තිබිනි.ඒවානම්,
 1. සිය ආදරවන්තිය වූ වාලිස් සිම්සන් අත්හැරීම.
2. රජය ඉල්ලා අස්වීම.
3.වාලිස් මෙනවිය තමන් සතුකරගෙන රජකම අත්හැරීම.

සිය ප්‍රේමවන්තිය වූ වාලිස් සිම්සන් විවාහ කරගැනීමේ දැඩි අවශ්‍යතාවක ඒ වන විටත් සිටි එඩ්වඩ් රජු අවසාන විසඳුම තෝරාගැනීමට තීරණය කලේය.ඒ අනුව 1936 දෙසැම්බර් මස 10 වන දින උදෑසන 10ට සිය සහෝදරයන් ඉදිරියේ තමන් කිරුළ අත්හරින බවට ලිඛිතව දිවුරුම් දී මහා බ්‍රිතාන්‍ය අධිරාජ්‍යයේ රජකමින් ඉල්ලා අස්වන ලදී.ඒ කිරුළ අත්හැරි ප්‍රතම හා එකම බ්‍රිතාන්‍ය පාලකයා ලෙස ඉතිහාස ගත වෙමිනි.
8 වන එඩ්වඩ් රජුගේ ඉවත්වීමෙන් හිස්වූ සිහසුන ඔහුගේ වැඩිමල් සොයුරාට හිමිවූ  අතර ඔහු "6 වන ජෝර්ජ්" ලෙස රජවිය.ඔහුගෙන් පසුව ඔහුගේ දියණිය වූ එලිසබෙත් කුමරිය හට රජකිරුළ හිමිවිය."2 වන එලිසබෙත්" ලෙස වර්තමානයේ බලයේ සිටින්නේ ඇයයි.

රජකම අත්හැරීමෙන් පසුව එඩ්වර්ඩ් කුමරු හා වාලිස් ස්ම්සන් මෙනවිය 1937 ජූනි මස 6 වන දින සරල විවාහ මංගල උත්සවයකින් විවාහ විය.රජකම අහිමිවීමත් සමගම එඩ්වඩ් හට Royal Highness හෙවත් "රාජකීය උතුමාණන්" යන ගෞරව නාමය අහිමි වුවද ඔහුගේ සහෝදරයා වූ 6 වන ජෝර්ජ් රජු විසින් එවන ලද විශේශ ලිපියකින් එඩ්වඩ් හට එම ගෞරව නාමය භාවිතා කල හැකිබවත් නමුත් ඔහුගේ බිරිඳ වූ වාලිස් හට හෝ ඇයට දාව උපදින කිසිඳු දරු මුණුබුරෙකුට එම නාමය භාවිතා කිරීම තහනම් බවත් දන්වන ලදී.
නමුත් එඩ්වඩ් හා ඔහුගේ බිරිඳව ජීවිත කාලය පුරාම බලපැවැත්වෙන පරිදි මහා බ්‍රිතාන්‍යයන් පිටුවහල් කරන ලදී. තවද රජ පවුල විසින් ඔවුන්ව නොසලකා හරින ලදී.නමුත් එඩ්වඩ් හට ඉතා කෙටි කාලයක් සඳහා පමණක් "බහමාස් හි ආණ්ඩුකාර " ධූරය හෙබවීමට අවස්තාවක් හිමිවුය.කෙසේ වෙතත් ඔවුන්ගේ ජීවිතෙන් වැඩිම කාලයක් ඔවුන් දෙදෙනා ප්‍රංශයේ ජීවත් විය.එඩ්වඩ් මියගියේද ප්‍රංශයේදීමය.ඒ 1972 මැයි 28 වෙනිදායි.වාලිස් ආර්යාව තවත් අවුරුදු 14 ජීවත් වූ නමුත් ඉන් වැඩිම කලක් ගෙවා දැමුවේ ගිලන් ඇඳෙහි ලෝකයාගෙන් හුදකලාවයි.පසුව ඇයද දුක්බර ලෙස 1986 අප්‍රේල් 24 දින මෙලොව අතැර ගියාය.ඒ ඇයගේ 90 වෙනි උපන්දිනයට මාස දෙකක් තිබියදීය.

එසේ විසිවන සියවස උරුමකම් කී විශිෂ්ටතම ආදර කතාවක හිමිකරුවන් දෙදෙනාම මෙලොව අතැර ගියහ.සිය ආදරය  වෙනුවෙන් ලොව විශාලතම මෙන්ම බලවත්ම අධිරාජ්‍යයේ කිරුළ මෙන්ම සියලු රාජකීය වරප්‍රසාද අත්හැර අටවන එඩ්වඩ් රජු විසින් ආදරය යනු පරිත්‍යාගය මිස අන්‍ කිසිවක් නොවන බවට ඉතිහාසය තුල සදා නොමැකෙන ලෙස සනිටුහන් කරන ලදී.

චායාරූපය :- එඩ්වඩ් කුමරු හා වාලිස් මැතිණිය.

    --- සංකල්ප ගුණතිලක✍️