නත්තල් තෑග්ග (ඇමරිකානු කෙටි කතාවකි)

------------------------------------------------------------------- O.Henry නම් ඇමරිකානු ලේඛකා විසින් 1905දී රචනා කරන ලද "The Gift of the Magi" නම් කෙටි කතාවේ සිංහල පරිවර්තනය.වාණිජකරණයේ උඩුසුළඟට  හසුව සුනුවිසුනු වී යන බලාපොරොත්තු සහ ආදරයේ ත්‍යාගශීලි පරිත්‍යාගයන් මනාව විවරණයට ලක් කරන්නකි මේ...
-------------------------------------------------------------------

      ඩෙල්ලා චාම් ගති පැවතුම් සහිත තරුණ බිරිඳකි.එදිනෙදා ජීවිතය යාන්තමින් ගැටගසා ගැනීමට තරම් වත්කමක් ඇති ඕ නිකම්ම නිකම් ගෘහණියක් වූවාය.එදා උදේ ඩෙල්ලාගේ ස්වාමිපුරුෂයා සිරිත් පරිදි වැඩට ගිය පසු නිවසෙහි තනිවූ ඇගේ මුල්ම කාර්යය වුනේ මාරු කාසි එකතු කල තමාගේ කැටය සඟවා තිබුණු තැනින් එළියට ගැනීමයි.

         ඩෙල්ලා තම කැටයෙහි වූ මුදල් තුන් සැරයක්ම ගණන් කර බැලුවාය.මුළු මුදලම සීමාවුනේ ඩොලර් එකයි සත අසූහතකට.ඒ සියල්ලම සිල්ලර මාරුකාසි,කේවල් කරලා මාළු වෙළෙන්දගෙනුයි එළවලු වෙළෙන්දගෙනුයි අඩු කරගත්තු සතේ දෙකේ කාසි.ඩොලර් එකයි සත අසූ හතෙන් කරන්න පුළුවන් මොන කෙංගෙඩියක්ද? නත්තල හෙටයි ! ජිම් එක්ක විවාහ වුනාට පස්සේ එළඹෙන පළවෙනි නත්තල !

කළයුතු එක දෙයක් ගැනනම් ඇයට හොඳටම පැහැදිලිය.ඒ ඇඳේ දිගාවී පුළුවන් තරම් හැඬීමයි.ජීවිතය කියන්නේ සිනහව සහ කඳුළ යන දෙකෙහි මනා ගැළපීමෙන් බිහිවී ඇති වින්දනාත්මක උරුමයක් විත්තිය ඇයට ඒත්තු ගොස් නැතුවා නොවේ.එහෙත් එය මෙතැනදී දෙන විසඳුම කුමක්ද?

      ඩෙල්ලා පදිංචිව සිටින නිවාස තට්ටුවේ කුලිය සතියට ඩොලර් අටයි.ඇගේ ස්වාමිපුරුෂයා ,ජිම් සතියකට උපයන මුදල ඩොලර් විස්සයි.එදිනෙදා අවශ්‍යය බඩු මිල ඉහළගිය නමුත් ආදායම නම් ඉහළ ගියේ නැහැ.ජිම් කලින් සතියකට ලැබූ ඩොලර් තිහ විස්ස දක්වා අඩුවුනේ ඔහු වැඩ කරන සාප්පුවේ ආදායම සීඝ්‍රයෙන් පහලට රූටාගෙන ගිය නිසයි.හැඬීම නැවැත්වූ ඩෙල්ලා කඳුළු පිස දමගෙන දෙකොපුලෙහි පියරු ටිකක් තවරා ගත්තාය.ඇගේ මනස තුල උද්ගතවන්නේ නත්තල සඳහා ජිම්ට දියයුතු තෑග්ග සම්බන්ධයෙන් මැවෙන සිහින කල්පනාය.අවුරුද්ද පුරාම එම තෑග්ග එම තෑග්ග තමාගේ ආදරය ඔහුට සිහි ගන්වන්නක් විය යුතුය.එය ඔහුටම ගැලපෙන දුර්වල අන්දමේ තෑග්ගක් විය යුතුය.එහෙත් ඩොලර් එකයි සත අසූ හතෙන් මිලදී ගත හැක්කේ මොන තෑග්ගක්ද?
     
    කැඩපත දෙස දෑස යොමුකල ඇගේ මුහුණ අමුතු සතුටකින් බබලන්නට විය.එහෙත් ඊලඟ මොහොතෙදී එය ලේ සිදීගිය පාණ්ඩු පැහැයට හැරුනේ හදිසි අකුණු සැරයකට බිය වූ කලෙක මෙනි.

    ජිම් ඉතා අගයකල වස්තු දෙකක් විය.එකක් නම් සිය පිය උරුමයෙන් ඔහුට ලැබීතිබුනු රනින් නිමවූ කොපුවක් සහිත අත් ඔරලෝසුවයි.අනෙක නම් සිය බිරිඳ වූ ඩෙල්ලාගේ දිගු සුමුදු වරලසයි.ඩෙල්ලා කැඩපත දෙස බලාගත්වනම සිය කෙස් කළඹ මුදා හැරියාය.එය තමන්ගේ දණහිසෙන් පහළය වැටීතිබෙනු ඇය දිටුවේ සියුමු සතුටකුත් සමගය.එහෙත් ඕ වහාම එය හිස මුදුනට කර බැඳගත්තාය.ඇයගේ දෙනෙතින් කඳුළු බිඳු කීපයක් ඒ සමගම බිම පතිත වූයේ ඇයටත් හොරාය.
             
             ඩෙල්ලා ගමන්බිමන් යනවිට අඳින කබායෙන් සැරසුනාය.දුඹුරු හිස්වැස්ම පැළඳගත්තාය.නිවසෙන් පිටවී දොරවසා අගුළු දමා පියගැට පෙළ බැස වීදීයට පිවිසුනාය.වීදිය දිගේ ගමන් කල ඕ කාන්තා ඇඳුම් පැළඳුම් මෝස්තර, කොණ්ඩා සැරසිලි අරුමෝසම් බඩු,නානා මාදිලියේ කාන්‍තා පාවහන් ප්‍රදර්ශනය කල වෙළඳ සංකීරණයකට ලඟා වුනාය."නවීන පන්නයේ කොණ්ඩා මෝස්තර" යනුවෙන් දිස්වුණු නාම පුවරුවක් අබියස ඇය නැවතුනාය.

         මදක් වටපිට බලා අඩියට දෙකට කොණ්ඩා මෝස්තර සාප්පුවට ඇතුළු වුනු ඩෙල්ලා සාප්පු අයිතිකාරිය ඇමතුවාය.

"ඔබ කොණ්ඩා මිලදී ගන්නවාද?"

"ඔව්,කාගෙද?"

"මගේ !"

"කෝ ! බලන්න, හිස්වැස්ම ගැලෙව්වානම්."

හිස්වැසුම අතට ගත් ඩෙල්ලා කෙස් කළඹ ලිහා මුදා හැරියාය.

"ඩොලර් විස්සක් දෙන්නම්"

"එහෙනම් ඉක්මන් කරන්න"

ගණුදෙනුව හමාර කල ඩෙල්ලා ඩොලර් විස්සද මිටමොළවාගෙන ජිම්ට පිරිණැමීමට සුදුසු තෑග්ගක් ගැනීම සඳහා ඉක්මන් පියවර තැබුවාය.රිදී පැහැයෙන් බැබළුණු එම කුඩා වස්තුව ජිම්ටම ගැලපෙන එකක් සේ ඇයට හැඟිණි.එය ඩොලර් විසි එකක් ගෙවා මිලදී ගැනීමට ඇයට සිදුවිය.තෑග්ග ගැනීමෙන් ප්‍රීතියෙන් මත්වූ ඇය ඉතුරු ශත අසූහතද රැගෙන නිවෙසට පැමිණියාය.

     හනි හනිකට කැඩපත අබියසට ගිය ඩෙල්ලා අනිමිසලෝචනාවෙන් මෙන් සිය හිස දෙස බලාසිට අඩ පැයකින් පමණ කෙටි හිසකෙස් පිළිවෙලකට සකස් කරගත්තාය.

"මම කරගත්තු දේට ජිම් දෙස් දෙවොල් තියන එකක් නෑ.කෙස් කළඹ ආයෙමත් ඉස්සර තිබුන විදියටම වැඩේවි.ඩොලර් එකයි සත අසූහතකින් කොහොමද තෑග්ගක් ගන්නේ. අනේ දෙවියනේ ! කොණ්ඩෙ නැතිවුනත් ජිම්ට මාව ලස්සනට පේනෙන්න සලස්වන සේක්වා!."යි තමාටම මුමුණමින් සිතිවිලි අතර අසරණව පසුවුනු ඩෙල්ලා පියවි ලොවට පිවිසුනේ නියමිත වෙලාවට නිවෙසට ඇතුළුවූ ජිම් දැකීමෙන් පසුවයි.

         ඩෙල්ලා ඉදිරියට පැමිණි ජිම් ඇයදෙස බලා ගත්වනම පසුවිය.එම බැල්මෙහි තරහක් නොවීය.විමතියක්ද නොවීය.විරෝධාකල්පයක් හෝ පිළිකුලක්ද නොවීය.ඔහු ඇය දෙස බලාගෙන සිටියේ අමුතුම තාලයේ උපේක්ෂා සහගත හැඟීමකිනි.ඩෙල්ලා ජිම් සමීපයට පිය නැගුවාය.

"අනේ ජිම්, ඔය විදියට ඔයා මා දිහා බලන්න එපා! මං ඒක කලේ ඔයාට තියෙන ආදරේට!හෙට ඔයාට දෙන්න නත්තල් තෑග්ගක් අරගන්න.දැන් අපි සන්තෝෂ වෙමු.මගේ කොණ්ඩෙනම් ආයෙමත් වැඩේවි ඉක්මනට.බලමුකෝ මොකක්ද වුනේ කියලා.කොච්චර ලස්සනද මේ තෑග්ග කියලා.ඔයාටම ගැලපෙන තෑග්ග.!"

"මොනවා...තෑග්ග නෙම්.!ඔයාගේ කොණ්ඩෙට මේ මොනවද වෙලා තියෙන්නේ ?"

"මං කොණ්ඩෙ කැපුවා!"

"ඔව් ! කොණ්ඩෙ කපලා වික්කා"

     නින්දෙන් අවදිවූවාක් මෙන් දෑස පිසහාගත් ජිම් සිය කබා සාක්කුවෙන් කුඩා පාර්සලයක් ඉවතට ගෙන එය ඩෙල්ලා අත තැබුවාය.වෙව්ලන ඇඟිලි වලින් එම පාර්සලය ලිහාගත් ඇයට දැකගත හැකිවුනේ තමා මෙතුවක් කල් බලාගැනීමට ආශාවෙන් පුලපුලා බලාසිටි කොණ්ඩා කටු සහ කෙස්වැටිට සරසන ආම්පන්න කට්ටලයකි.එහෙත් ඒවායෙන් සරසන්නට කෙස් කළඹක් ඇයට දැන් නැත.ඇය තම ළැමතුරෙන් කුඩා පෙට්ටියක් ඉවතට ගනිමින්,

"ජිම් මේ බලන්නකෝ ! මේක ඔයාට කියාපු තෑග්ග නේද කියලා.මගේ කොණ්ඩෙ නැතුවට මේ තෑග්ග නම් ඔයාටම ගැලපෙනවා.ඒකට නම් ඔයා ගොඩාක් සතුටු වෙයි." යි කීවාය.

පෙට්ටිය විවෘත කර තෑග්ග දෙස ඇසිපිය නොගසා බලාගෙන සිටි ජිම් සිතට කඩා වැදුනු ආවේගය යටපත් කරගනිමින් සිනාසෙන්නට වෑයම් කළේය.

"ඩෙල්ලා..අපි අපේ තෑගි දෙක තව ටිකක් කල්ගත වෙනකම් පරෙස්සම් කරලා තියාගමු.දැන් ඔය තියෙන දෙයක් ලිපේ තියන්න රෑ කෑමට.අපේ තෑගි පාවිච්චි කරන්න දැන්ම ඉක්මන් වැඩියි...
ඔයාට කොණ්ඩ සැරසිලි කට්ටලේ ගන්න මං සල්ලි හොයාගත්තේ මගේ අත් ඔරලෝසුව විකුණලා ! ඔයා මට තෑග්ගට ගෙනාපු ඔරලෝසු පටිය හයිකරන්න දැන් මා ලඟ අත් ඔරලෝසුවක් නෑ..! "


(උපුටා ගැනීමකි)

|Letterconik
|28-04-2020