ජැක්-රෝස් ආදර කතාව ඇත්තමද..???

1912 අවුරුද්දේ අප්‍රේල් මාසේ 15 වෙනිද පාන්දර යාමයේ "වයිට් ස්ටර් ලයින්" නැව් සමාගටම අයිති , ඒවන විට ලෝකෙ තිබ්බ ලොකුම මගී ප්‍රවාහන නෞකාව වුන වගේම සර්වබලධාරි දෙවියන් වහන්සේටවත් ගිල්ලවන්න බැරි විදියේ නැවක් විදියට අධිතක්සේරුවකටත් භාජන වෙලා තිබ්බ Titanic නෞකාව ජීවිත 1500ක් එක්ක සීතල අත්ලාන්තික් සාගර පතුලේ මිහිදන්වෙනවා.මේ සිදුවීම ලෝක ඉතිහාසයේ වඩාත් ඛේදනීයම සිදුවීමක්.දුක්බර මතකයක් ලෝකෙට ඉතුරු කරපු සිද්දියක්.
(අනතුර හා නෞකාව සම්බන්ද සියලුම තොරතුරු කලින් ලිපියේ ලියපු නිසා මේකෙදි ඒ ගැන සඳහන් කරන්නේ නෑ).

මේ සිදුවීම අලලා පොත්-පත් , කවි ගී රචනා වගේම මාලා නාටක සහ චිත්‍රපටත් දුසිම් ගණන් වලින් බිහිවුනා.ඒත් ඒ සියල්ලම පරයා ඉදිරියෙන්ම තියෙන නිර්මාණය තමයි 1997 දී එළිදැක්වුනු ජේම්ස් කැමරන්ගේ අධ්‍යක්ෂණයෙන් නිමවුනු, IMDb සහ රොට්න් ටොමැටෝස් අගයන් පිළිවෙලින් 7.8ක් සහ 89%ක් හිමිකරගෙන තියෙන "Titanic" චිත්‍රපටිය.ඔව්...ඒ අපි බලපු, අපි කතාබහ කරන වගේම අපි ආදරේ කරන චිත්‍රපටිය.ජැක් සහ රෝස් දෙදෙනා සදාතනික ප්‍රේමවන්තයන් බවට පත් කරපු චිත්‍රපටය.

Titanic චිත්‍රපටයේ පිටපත ලියන්නෙත් ජේම්ස් කැමරන්මයි.චිත්‍රපටයේ ප්‍රධාන චරිත වන රෝස්ගේ සහ ජැක්ගේ චරිත රඟ දැක්වූයේ පිළිවෙලින් 'කේට් වින්ස්ලට්' සහ 'ලියනාඩෝ ඩිකැප්‍රියෝ' විසිනුයි.මහළු රෝස්ගේ චරිතය රඟ දක්වන්නේ 'ග්ලෝරියා ස්ටුවර්ට්' විසින්.

ජැක්ගේ චරිතය සඳහා කැමරන්ගේ මනසේ නළුවන් කීප දෙනෙක්ම මැවී තිබුනා.ඒත් අවුරුදු 21ක තරුණයෙකුගෙ චරිතයක් කිරීමට ඔවුන් සියල්ල වයසින් වැඩි බවක් පෙනුනා.ඒ වගේම මේ චරිතට සුපිරි නළු 'ටොම් කෲස්'ගේද අවධානය යොමු වුනා.නමුත් ටොම් කෲස්ගේ අයකිරීම ඉතා වැඩි වූ නිසා මේ සඳහා " එවකට නවක නළුවෙකු වූ 'ලියනාඩෝ ඩිකැප්‍රියෝ' ව තෝරාගත්තා.

රෝස්ගේ චරිතය සඳහාත් ඒ වගේන විවිධ නිළියන්ගේ නම් නිර්දේශ වී තිබුනත් ඔවුන් විසින් ඒ චරිත ප්‍රතික්ෂේප කිරීමෙන් පස්සේ අදාල චරිතය සඳහා පුරප්පාඩුවක් ඇතිවුනා.මේ ගැන දැනගත් කේට් වින්ස්ලට් එවකට ඇය ජීවත් වුන එංගලන්තයේ ඉඳලා ඇමරිකාවේ ඉඳපු කැමරන්ට දිගින් දිගටම ලිපි මගින් තමන් රෝස්ගේ චරිතය භාර ගැනීමට කැමැත්තෙන් ඉන්නා බව කේට් විසින් දැන්වූවා.ඒත් ජේම්ස් කැමරන්ගේ හිතේ කේට් වෙනුවෙන් ඉඩක් තිබුනේ නෑ.කොහොමහරි දවසක කේට්ව ගෙන්න ගන්නවා එයාගේ රඟපෑම් පරීක්ෂා කරල බලන්න.ඩිකැප්‍රියෝ එක්ක කරපු තිර පරීක්ෂණයෙන් පස්සේ ඩිකැප්‍රියෝ නම් දක්ෂ තරුණයා ගැන පැහැදුන කේට් වින්ස්ලට් කැමරන්ට පැවසුවේ තමන්ව තෝරා නොගත්තත් ඔහුව අනිවාර්යයෙන්ම තෝරාගන්නා ලෙසයි.
කෙසේහෝ කේට්ගේ දැඩි උනන්දුව මත රෝස්ගේ චරිතය සඳහා ඇයව තෝරාගන්නවා.එවකට එතරම් ජනප්‍රිය නොවුන මේ තරුණ නළු නිළි දෙපල චිත්‍රපටිය ඉතාම සාධාරණක් කරනවා.ජැක් රෝස් ආදර කතාව සදාතනිකව මිනිස් හදවත් ඇතුලේ තැන්පත් වීමෙන්ම ඒ කරුණ පැහැදිලියි.
චිත්‍රපටිය හැම අතින්ම වගේ ඉතාම සාර්තකයි.චිත්‍රපටියේ සංගීතය පවා ඉතාම විශිෂ්ටයි.අති දක්ෂ සංගීත අධ්‍යක්ෂකවරයෙක් වුන ජේම්ස් හෝනර් තමයි Titanic film එකේ සංගීතයේ නිර්මාපකයා.සංගීත අධ්‍යක්ෂණය සඳහා කැමරන් මුලින්ම තෝරාගත්තේ ගායිකා Enyaව.නමුත් ඇය එය ප්‍රතික්ෂේප කිරීමෙන් පස්සේ කැමරන්, ජේම්ස් හෝනර් දිහාවට හැරෙනව.කැමරන්ට ඕනෙ වෙන්නේ වචන රහිත මිනිස් කටහඬින් ගැයෙන තේමාවක් තමයි ප්‍රධාන තේමාව වෙනුවට.Enyaගෙ වගේ ශෛලයක් ඒ වෙනුවෙන් ඕනෙ වෙනවා.මුලින් Enyaව නිර්දේශ කරන්න හේතුවත් ඒකමයි.කොහොමහරි හඬ පරීක්ෂණ ගණනාවකින් පස්සේ නෝවේජියානු ගායිකා Sissel Kyrkjeboව මේ සඳහා තෝරාගැනෙනවා.ඉතාම ආදරණීයව ගැයෙන Hymn to the sea නම් තේම සංගීත කණ්ඩය වර්ණවත් වන්නේ ඇයගේ හඬින්.
ඒත් සංගීත අධ්‍යක්ෂක ජේම්ස් හෝනර්ට ඕනෙ වෙනවා සිංඳුවක්.ඉතින් එයා රහසේම ගීතයක් ලියලා සෙලින් ඩියෝන්ගේ කටහඬින් ඒක ගායනය කරවනවා.මේ සිංඳුව කැමරන්ගෙත් හිත් ගන්නවා.ඒ නිසා කැමරනුත් මේ ගීතය චිත්‍රපටයේ ප්‍රධාන තේමා ගීතය විදියට යොදාගන්න කැමති වෙනවා.අන්න ඒ සිංඳුව තමයි My Heart will Go On නමින් ලෝක ප්‍රකට වුනෙ.කොච්චර ප්‍රසිද්ධ වුනාද කියනව නම් අදටත් චිත්‍රපටි ගීත අතරින් ලෝකෙ වැඩිපුරම අලෙවි වුන ගීතය තමයි ඒ.

ඉතින් ඩොලර් මිලියන 200ක් වියදම් කරල හදපු චිත්‍රපටිය මුලින්ම 1997 නොවැම්බර් 01 වෙනිදා ටෝකියෝ වලදී තමන්ගේ ප්‍රථම දර්ශන වාරය පවත්වනවා.ඊට මාසෙකට පස්සේ දෙසැම්බර් 01 වෙනිදා ලෝකේ අනික් රටවල් වලත් මේක තිරගත වීම ආරම්භ කරනවා.
ඉතින් අද වෙද්දී ටයිටැනික් චිත්‍රපටිය ලෝකෙ පුරාම ප්‍රදර්ශනයෙන් ලබපු ආදායම ඩොලර් බිලියන දෙකටත් වැඩියි.ලෝකෙ වැඩිම ආදයමක් ලබපු චිත්‍රපටි අතරින් Titanic තියෙන්නේ තෙවන ස්ථානයේ.ඒ ජේම්ස් කැමරන්ගේම චිත්‍රපටියක් වන Avatar චිත්‍රපටියට සහ Avengers චිත්‍රපටි මාලාවේ අවසාන චිත්‍රපටිය වූ Avengers:End Game යන සිනමා පටවලට පිළිවෙලින් දෙවනි සහ පළවෙනි ස්‍ථාන හිමිකරදෙමින්.
ඒ වගේම ලෝක ඉතිහාසයේ වැඩිපුරම ඇකඩමි සම්මාන නිර්දේශයන් ලද චිත්‍රපටිය වෙන්නෙත් Titanic.ඒ ඇකඩමි සම්මාන 15ක් සඳහා නිර්දේශ වෙමින්.ඒ වගේම ඒ නිර්දේශයන්ගෙන් 11ක්ම දිනාගන්න සමත් වෙනවා.ඒ වැඩිපුරම ඇකඩමි සම්මාන දිනාගත් චිත්‍රපටිය බවට පත්වෙමින්.අදටත් එම වාර්තාව බිඳින්න කිසිම චිත්‍රපටයකට පුළුවන් වෙලා නෑ.ඒ කියන්නේ Titanic කියන්නේ වැඩිම ඇකඩමි සම්මාන දිනපු චිත්‍රපටි තුනෙන් එකක්.ඇකඩමි සම්මාන 11 බැගින් දිනාගෙන Titanic හා සම තැන් ගන්නේ Ben Hur සහ Lord of the Rings තෙවන චිත්‍රපටිය වූ Lord of the Rings:The Return of the King යන චිත්‍රපටියි. 70 වන ඇකඩමි සම්මාන රාත්‍රියේදී Titanic ඔස්කා සම්මාන වැස්සකට මේ වගේ තෙමුනත් අවසානාවකට හොඳම නිළියට නිර්දේශ වුන කේට් වින්ස්ලට්ටත් රෝස් ආච්චි ලෙස රඟපාල හොඳම සහය නිළියට නිර්දේශ වුන ග්ලොර්යා ස්ටුවර්ට්ටත් ඒ රාත්‍රියේ ඇකඩමි සම්මාන දෑත් මානයේ තිබී ගිලිහී යනවා.
(කේට් වින්ස්ලට් 2009 අවුරුද්දෙදී The Reader චිත්‍රපටියේ 'හනා ෂ්මිත්' චරිතය උදෙසා හොඳම නිළිය විදියට ඇකඩමි සම්මානා දිනනවා.ජැක්ට පනපොවපු ඩිකැප්‍රියෝ 2016දී The Revenant චිත්‍රපටය උදෙසා හොඳම නළුවා සම්මාය දිනනවා)

Titanic කොච්චර සාර්තකද කිව්වොත් සැබෑ Titanic සිදුවීමටත් වඩා චිත්‍රපටිය මිනිස් හදවත් ඇතුලේ පැලපදියම් වෙලා.ප්‍රේක්ෂක හදවත් ඇතුලේ ඒ චරිත සදා ජීවමාන තත්වය ලබලා.අවුරුදු 23ක් ගිහිල්ලත් ජැක්-රෝස් මනඃකල්පිත චරිත කියල පිළිනොගන්නා තරමටම කතාව හිත් ඇතුලෙ ජීවමාන වෙලා.
ඒක තමයි සිනමාකරුවෙක් සතු වෙන්න ඕන විශිෂ්ටභාවය.
ඇත්තම ජැක් රෝස් දෙන්න කැමරන් මවපු මනඃකල්පිත චරිත දෙකක්.ඒ අනතුරේ වේදනාකාරී බව මිනිස් සිත් තුලට කාවද්දන්න ආදරය සහ විරහව කියන කාරණා භාවිතා කරපු අති සාර්තක අවස්තාවක් විතරයි.ඒත් මේ දෙන්නෑ හැරෙන්න අනික් ගොඩාක් චරිත , සෑම සිදුවීමක් වගේම සීයට සීයක් වගේම ඇත්තට වුන දේවල් තමයි.කොටින්ම නෞකාවේ නිර්මාතෲ වුන තෝමස් ඇන්ඩෲස් , නැව් සමාගම් හිමිකරු , කෝටිපතිනියක වුන මාගරට් මොලී බ්‍රවුන් වගේ සැබෑවටම Titanic ඛේදවාචකයට මුහුණ දුන්න චරිත ගොඩාක් චිත්‍රපටියේ ඒ විදියටම නිරූපණය වෙනවා.ඒ පෙනුමින්ම ඔවුන්ව චිත්‍රපටයෙන් නිරූපණය වෙනවා.
ඇත්තටම සිද්දවුන පොඩි සිදුවීමක් පවා චිත්‍රපටියේ පෙන්නනවා.උදාහරණයක් විදියට චිත්‍රපටියේ තියෙන, අර බෝට්ටු වලට මිනිස්සු ඇතුලත් කරද්දී ඇතිවන කලබලය පාලනය කරන්න නැවේ කාර්යමණ්ඩල නිළධාරියෙක් වෙදි තියෙන සිද්දිය පවා ඇත්තටම වුන එකක්.ඒ විතරක් නෙමේ ෆිල්ම් එකේ රෝස් කියන විදියට වතුරට වැටුන 1500න් හය දෙනෙක් බේරගන්නවා.ඒකත් ඇත්තතම වුන එකක්.ඒත් ඒ බේරගන්නේ 6ක් නෙමේ.5ක්.ඉතින් ඉතුරු වුන එක්කෙනා රෝස් නම් මනඃකල්පිත චරිතය.

ජැක් සහ රෝස් ඇත්ත අය නෙමේ කියලා ගොඩාක් අය පිළිගන්න අකමැතියි.ඒ ඒ තරම් ඔවුන් ඒ චරිත වලට ආදරය කරන නිසා.

සමහර වාර්තාවල සඳහන් වෙනවා වයසක රෝස් කියන්නේ ඇත්ත කෙනෙක් කියලා.ඒ නිසා රෝස් කියන්නේ ඇත්තම චරිතයක් කියලා ගොඩක් අය පිළිගන්නවා.ඒ කතාව වැරදියි.රෝස් ආච්චිගේ චරිතයට ආභාශය ඇත්තටම කෙනෙක්ගෙන් ගත්ත බව ඇත්ත. චරිතය ගොඩනගන්න අවශ්‍ය දත්ත විතරයි.සරලවම ඒ අනුකරණය කිරීමක්.මොකද ඔය ඇත්ත කෙනාට Titanic නැවත් එක්ක කිසිම සම්බන්දයක් නෑ.ඇය වියපත් වූ කලාකාරියක්.ඒකයි ජේම්ස් කැමරන් වයසක රෝස් චරිතය මවද්දී ඇයව හිතෙන් මවාගන්නේ.මොකද චිත්‍රපටියට අනුව රෝස් කියන්නෙත් වියපත් වුන කලාකාරියක්.

ඒ වගේම චිත්‍රපටියේ සඳහන් වෙම අර මාලය.Heart of the Ocean හෙවත් සාගරයේ හදවත නම් නිල් දියමන්ති මාලය.ඒක වුනත් ඇත්ත එකක්. ඒත් ඒක Titanic එක්ක සම්බන්ද වෙන්නේ film එකේ පෙන්නන විදියට නෙමේ.මොකද ඒක ඇත්තටම දියමන්ති එකක් නෙමේ.ඒ වගේම ඇත්ත මාලය නිල් දියමන්තියකුත් නෙමේ.දහසය වන ලුවී රජතුමා එක්ක කිසිසම්බන්දෙකුත් නෑ. හදවතක හැඩය වුනෙත් නෑ.ඒ වගේම ඒකේ නමත් Heart of the Ocean නෙමේ.ඒ වගේම ඒක අනතුරෙන් අතුරුදහන් වුනෙත් නෑ film එකේ පෙන්වන විදියට.ඒක අයිතිව තිබ්බ 19 හැවිරිදි 'කේට් ෆ්ලෝරන්ස් පිලිප්ස්' නම් වූ විවාහක කාන්තාව බේරෙද්දී ඒ මාලෙත් එයා එක්කම බේරෙනවා.

ඉතින් Titanic කියන්නේ ඇත්ත සිද්දි මත පදනම් වුන චිත්‍රපටියක් වුනත් ජැක් රෝස් චරිත සහ එයාලා එක්ක සම්බන්ද ඔක්කොම දේවල් මනඃකල්පිතයි.නමුත් අනික් සිද්දි ඔක්කොම වගේ ඇත්ත.හිතාගන්න බැරිතරම් ඇත්ත.ඒකයි ඒ කතාව එච්චරම සුවිශේෂී වෙන්නේ.

ඒත් අපිට මෙහෙම හිතන්න පුළුවන්.ඒ තමයි නැවේ හිටපු සියගානක් විවාහක අවිවාහක ප්‍රේම වන්තයන්ට අත්වුන ඛේදනීය ඉරණම මේකමයි කියලා අපිට හිතන්න පුළුවන්.මොකද බෝට්ටු වලට නග්ගද්දී ප්‍රමුඛස්ථානය දෙන්නේ කාන්තාවන්ට සහ ළමයින්ට.එත්කොට ඒ කාන්තාවන්ගේ ප්‍රේම වන්තයන් , ඒ ළමයින්ගේ පියවරුන් ගිලෙන නැවේ හිටියා වෙන්න ඕන.ඉතින් ඔවුන් තමන්ගේ ආදරණීය පෙම්වතිය , බිරිඳ , දරුවන් වෙනුවෙන් තමන්ගේ ජීවිතේ කැපකරා.හරියට රෝස් වෙනුවෙන් ජැක් කරාවගේ.අඩුම ජැක්ට රෝස්ට ස්තූති කරන්න ,තමන් ඇයට කොච්චර ආදරේද කියන්න අවස්තාවක් හරි හම්බුනා.ඒත් ගිලෙන නැවේ නැවතිලා තමන් වෙනුවෙන් වැය වෙන්න තිබ්බ ඉඩ තමන්ගේ ආදරණීයන් වෙනුවෙන් පරිත්‍යාගය කරලා නිහඬවම මරණය වැළඳගත්තු ඒ සැබෑ ආදරණීය ප්‍රේමවන්තයන්ට , පියවරුන්ට එහෙම අවසාන අවස්තාවක්වත් ලැබෙන්න නැතුව ඇති.

ජේම්ස් කැමරන් තෝරගන්නේ මෙන්න මේ පොදු ඛේදවාචකය.ඒක ලස්සනට පැහැදිලිව පෙන්නන්න තමා එයා ජැක්-රෝස් නම් ආදරවන්තයන් නිර්මාණය කරන්නේ.අර සියගානකගේ වේදනාවන් කැටි කරලා ජැක්-රෝස් තුලින් පෙන්නුව එක තමා ජේම්ස් කැමරන් කරන්නේ.ඒ කියන්නේ ඇත්තටම ජැක්-රෝස් කියලා දෙන්නෙක් නොවුනත් ඉතිහාසයේ නම් නොකියවුනු , නම් නොලියවනු ලෝකයාගෙන් අමතක වෙලාගියපු ජැක්ලා රෝස්ලා සියගානක් එදා රෑ ඒ ඛේදවාචකයට මුහුණ දුන්නා.කැමරන් තෝරගන්නේ අන්න ඒ කුලකයෙන් එක නියැදියක්.ඒ නියැදිය පෙන්වන්න ගොඩනගපු මනඃකල්පිත චරිත ද්විත්වය තමා ජැක් රෝස්.
ඉතින් අපි අඬන වැලපෙන ජැක් රෝස්ට වඩා වේදනාවක් දරාගෙන මැරුණ , මැරි මැරී ජීවත් වුන පිරිසක් එදා රාත්‍රියේ අත්ලාන්තික් සාගරයේ සීතල ජල තලය මතදී වෙන්වුනා.ඔන්න ඕකයි ඇත්තම කතාව.
කැමරන්ගේ නිර්මාණය ඒ අතින් ඉතාමත් සාර්තකයි.ඇත්තටම සාර්තකව වැඩියි.ඒ කොච්චරක්ද කියනවා නම් ජැක් රෝස් නම් මනඃකල්පිත චරිත ඇත්තම අය කියලා හිතෙන තරමටම ඒක සාර්තකයි......


|Letterconik
|16 - 04 - 2020